.webp){kind=icon}
Профитот и продажбата на „Мајкрософт“ (Microsoft Corp.) ги надминаа проекциите во третиот фискален квартал, поттикнати од еластичната корпоративна побарувачка за нејзиниот основен софтвер и услугите во облак. Акциите скокнаа за повеќе од пет отсто во доцното тргување во вторникот.
Добивката изнесува 2,45 долари по акција во кварталот што заврши во март, а продажбата се зголеми за 7,1 отсто, на 52,9 милијарди долари, се наведува во соопштението на производителот на софтвер. Тоа ја надминува просечната процена на аналитичарите за заработка од 2,24 долари по акција и приход од 51 милијарда долари што беше посочена во истражувањето на „Блумберг“.
Во внимателно следениот бизнис на „Мајкрософт“ за услугата во облак, Азур (Azure), приходите се зголемија за 31 отсто, без влијанието на валутните флуктуации, што е во согласност со прогнозите. Продажбата на комерцијални облак-производи, како што се Азур и софтверот за продуктивност Офис, се зголемила за 22 отсто, на 28,5 милијарди долари, соопшти компанијата.
Иако вкупниот раст на продажбата се забави на едноцифрен број по пет години силен подем, производите на „Мајкрософт“ базирани на облак, како што се Азур и Офис 365, продолжија да привлекуваат клиенти дури и кога многумина ги намалија трошоците во услови на нестабилна економија. За да помогне да се надмине поширокото забавување, „Мајкрософт“ годинава укина 10.000 работни места, вклучувајќи ги и основните бизниси, како што се гореспоменатиот Азур и безбедносниот софтвер.
Сатја Надела
Bloomberg
Компанијата со седиште во Редмонд, Вашингтон, исто така го задржа вниманието на клиентите, бидејќи извршниот директор Сатја Надела се насочи кон значајни надежи за вештачката интелигенција, вклучувајќи ги и пријавените 10 милијарди долари како инвестиција во „Опен еј-ај“ (OpenAI) и новиот четбот на Винг (Bing) за интернет-пребарување, што е стратегија за подобрување на идните продажби на Азур, рекламите на просторот за пребарување и услугите за канцелариска продуктивност.
„Кога ќе погледнете некои други големи технолошки акции, 'Мајкрософт' се држи подобро од нив затоа што барем не остварува негативен раст“, вели Ден Морган, висок менаџер во „Синовус“ (Synovus Trust Co).
Акциите на компанијата скокнаа до 291,30 долар во продолженото тргување по извештајот, откако во Њујорк се затворија на 275,42 долари. Акциите пораснаа за 20 отсто во кварталот, поради оптимизмот за новите планови на „Мајкрософт“ и производите за вештачка интелигенција, во споредба со седум отсто добивка на индексот S&P 500.
