.webp){kind=icon}
„Ер Франс-КЛМ“ (Air France-KLM) се подготвува за напорна празнична сезона во услови на голема продажба на летни билети и информира дека целосно е вратена стратегиската автономија по отплатата на државната помош за пандемијата, сугерирајќи дека можеби повторно ќе размисли за купување за да ја зајакне својата позиција.
„Нето-загубата во првото тримесечје се намали на 344 милиони евра (380 милиони долари) од 552 милиони евра, колку што изнесуваше пред една година“, се наведува во денешното соопштение на „Ер Франс-КЛМ“. Компанијата ги зголемила приходите за 42 проценти, на 6,33 милијарди евра, надминувајќи ги малку очекувањата на аналитичарите.
Закрепнувањето на побарувачката за воздушен сообраќај продолжи во Северна Америка, додека влијанието од штрајковите на контролорите на воздушниот сообраќај во Франција го ограничи прометот на неколку милиони евра, соопшти авиокомпанијата.
„’Ер Франс-КЛМ’ продолжи да покажува силен раст на приходите и да генерира готовински текови благодарение на многу охрабрувачката летна продажба на билети“, рече главниот извршен директор Бен Смит, додавајќи дека сега стојат на свои нозе по целосната отплата на преостанатиот дел од државната помош. Смит во февруари рече дека компанијата „ја свртела страницата“ од пандемијата, која предизвика невиден пад на индустријата и ги принуди на користење владина финансиска помош. Излегувањето од рамките на државната помош дава флексибилност за авиокомпанијата да го продолжи својот пат на раст.
Извршниот директор веќе сигнализираше интерес за преземање удел во португалскиот авиопревозник ТАП (TAP SA), бидејќи владата во Лисабон бара поддржувач за авиокомпанијата што беше принудена да ја спаси за време на здравствената криза.
„Резултатите главно се поттикнати од повисоките цени“, напиша во белешка аналитичарот на „Ситигруп“ (Citigroup), Сатиш Сивакумар.
Глобалната воздухопловна индустрија ужива силно враќање откако повеќето земји ги укинаа ограничувањата против коронавирусот и луѓето продолжија да патуваат како за бизнис, така и за одмор. „Дојче Луфтханза“ (Deutsche Lufthansa AG) неделава даде оптимистички преглед на раните летни месеци, што е клучен период на патување за воздухопловната индустрија. Претходно денеска ИАГ (IAG) објави изненадувачка оперативна добивка во првиот квартал бидејќи резервациите за летото се забрзаа и авиокомпанијата имаше корист од пониските цени на горивото. И таа компанија ги зголеми своите очекувања.
