„Синестар синемас“ (CineStar Cinemas), најголемиот регионален кинооператор, минатата недела во Косово го отвори својот најголем мегаплекс досега со 15 киносали. Комплексот е лоциран во Приштина, во најголемиот трговски центар во овој дел на Европа, „Приштина мол“ (Prishtina Mall).
„Синестар синемас“, во сопственост на „Блиц синестар“ (Blitz -cinestar), е најголемиот синџир на кина во регионот, со 28 т.н. мултиплекси, 182 сали и приближно 28.000 седишта на подрачјето на Хрватска, Србија, Босна и Херцеговина. Компанијата лани остварила приход од 25,17 милиони евра, за околу 38 отсто повеќе од 2021 година, додека нејзината добивка достигнала 2,6 милиони евра, што е зголемување за речиси 94 отсто.
Најлошата година за бизнисот на „Синестар“ беше пандемиската 2020-та, која компанијата ја заврши со загуба од речиси три милиони евра.
„Синестар“ во Приштина го претстави концептот „кинодестинација“ (destination cinema), кој е апсолутен тренд во светската кинематографија, а комплетен новитет во Косово. Со 15 модерно опремени киносали, со приближно 2.000 седишта, „Синестар мегаплекс“ (CineStar Megaplex) во Приштина е најголемото и најмодерно кино во Косово, објави компанијата.
„Синестар“ за првпат во рамките на својот синџир донесе еден од најпрестижните светски киноформати, „скрин екс“ (Screen X). Тоа е специјална кинотехнологија во која платното е проширено налево и надесно од централниот екран, што му овозможува на гледачот панорамско филмско искуство од 270 степени, познато како проширено кино.
.webp){kind=icon}
