.webp){kind=icon}
Ефектите од кризата во ИТ-секторот се прелеале и во работењето на српската компанија ХТЕЦ (HTEC), која била принудена на реорганизација, поради што 200 вработени веќе се отпуштени, потврди за српската редакција на „Блумберг Адрија“ директорката за комуникации Катарина Урошевиќ. Како што наведе таа, тоа е седум отсто од вкупниот број вработени во компанијата.
„Ситуацијата на глобалниот ИТ-пазар е исклучително предизвикувачка, а тоа досега го покажаа големиот број отпуштања во водечките светски технолошки компании“, вели Урошевиќ во своите одговори за „Блумберг Адрија“. „За жал, ефектите од кризата се прелеаја на регионалниот пазар“.
Таа појаснува дека компанијата „ХТЕЦ груп“ на почетокот на годината вовела низа мерки во насока на рационализација на трошоците и зајакнување на тимовите што работат на развој на нови деловни можности, со цел зачувување здрав бизнис и понатамошен раст.
Според неа, извршена е реорганизација на деловните единици и оптимизиран е бројот на инженери што извесно време не биле ангажирани во проекти и чии знаења и вештини, за жал, не биле соодветни за областите на раст што се очекуваат во наредниот период.
„Покрај реорганизацијата на функционалните единици, пренасочувањето на луѓето и преквалификацијата, за жал, овој процес на реорганизација и оптимизација опфати околу 200 вработени со кои моравме да се разделиме, што е околу седум проценти од нашата организација. Жалиме што овие колеги повеќе не се дел од нашиот тим и правиме сè што е во наша моќ да ги поддржиме во нивното понатамошно професионално патување“, рече Урошевиќ.
Од друга страна, таа вели дека ХТЕЦ го продолжува процесот на вработувања во клучни области на раст, како и дека работењето на компанијата е стабилно, а во првиот квартал е забележан раст на приходите од 30 отсто.
Сепак, во компанијата овој резултат, иако солиден, не е во согласност со очекувањата и амбициите на компанијата. Исто така, иако секторот моментално е во криза, таа наведува дека покрај органскиот раст, сè уште активно ги истражуваат можностите за понатамошни стратегиски преземања што би донеле нови можности за компанијата и нејзините вработени, како во регионот на Југоисточна Европа, така и во други локации каде што работи компанијата, а пред сè во САД и Велика Британија.
ХТЕЦ експлозивно се прошири во последните години преку органски раст и низа преземања, најавувајќи пред една година отворање на 1.000 нови работни места. Како еден од најсериозните кандидати да стане прв српски еднорог, ХТЕЦ во последните пет години собра 124 милиони евра инвестиции.
Овој стартап ги ревидира постојните технолошки системи на своите клиенти, ја оценува вредноста на инвестициите, развива технолошки стратегии и платформи за своите клиенти. Компанијата соработува со некои од најпознатите технолошки компании и многу компании од листата „Форчн 500“ (Fortune 500). Формалното седиште на ХТЕЦ е во Сан Франциско, Калифорнија, а работи и во Скандинавија, Холандија, Обединетото Кралство, Србија, Словенија, Бугарија, Босна и Херцеговина и Северна Македонија.
ХТЕЦ во Македонија
Канцеларијата на „ХТЕЦ груп“ во Скопје е отворена во почетокот на 2021 година. Во тоа време беше соопштено дека се малкумина, но дека имаат планови за амбициозен раст.
Во април таа година претставници од компанијата беа кај тогашниот премиер Зоран Заев, а главниот оперативен директор на групацијата Дејвид Шох му го претстави на премиерот Заев амбициозниот план на компанијата за инвестиции во регионот, кој вклучува формирање центар за развој во земјава.
„Ние веруваме дека со обезбедување уникатни можности за развој на кариера, конкурентни пакети за компензација и шанса да работиме со водечките глобални корпорации за врвни технологии можеме да отвориме нови можноста за врвните млади таленти на Северна Македонија и да помогнеме во напорите на земјата во борбата против економската миграција на работната сила“, рече на средбата Шох.
Заев им ги презентирал предностите на пакетот на Владата за поддршка на странските инвеститори.
