Моќен почеток на годината кој ветува посилен раст на компанијата до крајот на годината бележи „Еуролинк осигурување“. Компанијата е на првата пазарна позиција во земјата, а за сите аспекти на работењето Блумберг Адрија зборува со Марија Томеска, претседателката на Управниот одбор на „Еуролинк осигурување“.
Имавте одлични резултати на почетокот на годината. Како го оценувате Вие овој успех и на што се должи тој?
М.Томеска: Заклучно со април 2023 година, „Еуролинк“ осигурување е на првата пазарна позиција со 540 милиони денари бруто-полисирана премија, а тоа покажува одличен почеток на годината. Можеме да бидеме горди на овие резултати и на довербата што ни е дадена од нашите клиенти, соработници и од нашиот тим.
Моќниот почеток на оваа година покажува дека конзистентноста и истрајноста во деловната стратегија насочена кон одржлив и умерен раст носи резултати. Нашата предност лежи во диверзифицираното портфолио што обезбедува стабилност на долг рок, силен капитал што изнесува 641 милиони денари и управување со ризиците според светски стандарди.
Посебно ги истакнувам одличните резултати во класата на имотно осигурување, каде што имаме 50 отсто раст во однос на истиот период минатата година. Ние сме единствените на пазарот што обезбедивме осигурително покритие за првите ветерници во државата, а со тоа директно ја поддржуваме транзицијата кон користење енергија од обновливи извори. Лидери сме во осигурување објекти во градба, при што повеќе години ги осигуруваме најголемите инфраструктурни проекти во државата.
Дополнително ги зајакнавме нашата позиција и знаење со тоа што сме дел од Групацијата ГРАВЕ со седиште во Грац, Австрија, која е една од најзначајните осигурителни институции во регионот на Централна и Југоисточна Европа со речиси 200-годишна традиција.
За постигнување на овие резултати, континуирано вложуваме во нашите вработени, во нивната висока мотивираност и едукација, со цел да им обезбедат најдобра услуга на клиентите.
„Еуролинк“ се стреми да ги исполни ветувањата дадени на клиентите и да ја оправда нивната доверба, а со тоа ќе остане избор број 1 за сите осигурителни потреби на клиентите.
Го споменавте имотното осигурување, кое е најголемата доброволна класа кај нас. Што сè е вклучено во осигурувањето имот и колку се практикува?
М. Томеска: Имотното осигурување е стабилна класа и интересот е во континуиран раст во сите изминати години. Сепак, на македонскиот пазар сè уште сме далеку од практиката во развиените земји, каде што иако не е задолжителна класа, имотното осигурување претставува неразделив дел од доброто деловно работење. Кај нас, дури 83 проценти од сите регистрирани правни лица, односно над 80.000 субјекти немаат никаков осигурителен продукт за имотот и се изложени на ризик од нарушување на континуитетот во работењето доколку се соочат со некоја поголема штета врз имотот.
Квалитетното имотно осигурување се покажува како клучно решение за справување со несакани ситуации кога ќе настанат штети врз деловниот објект, залихата и опремата, а за кои бизнисот не е во позиција самостојно да ги надмине.
Со нашите решенија овозможуваме враќање на фокусот на најважното ‒ бизнисот да продолжи да функционира успешно, со тоа што ја преземаме одговорноста за покривање на трошоците од штети настанати при пожар, поплава, кражба, прекин на работа и останати чести ризици со кои може да се соочи секој бизнис.
Какво е Вашето искуство со правните лица кога е во прашање имотното осигурување?
М. Томеска: Постои разлика во практиката кај најголемите компании на пазарот и сите други помали бизниси. Кај најголемите компании, осигурувањето имот е стандардна практика на која се посветува внимание, па среќаваме дури и цел сектор или вработени задолжени за осигурување. Дополнително, компаниите што се дел од меѓународни групации бараат софистицирани осигурителни покритија што се во согласност со светската практика. Тие барања нè мотивираат да креираме пакети по мерка за потребите на овие клиенти, следејќи ја најдобрата светска практика.
Кај помалите компании најчесто не се практикува имотно осигурување поради неизвесноста или непредвидливоста на нивниот бизнис или, пак, се осигурува само тоа што мора поради задолжување во банка. Ние во „Еуролинк“, со цел да го зајакнеме осигурувањето кај малите и микро претпријатија и за да го олесниме процесот на одлучување, имаме пакети што се однесуваат на конкретни целни групи бизниси (услужна дејност, производствена дејност итн.) и кои во фокусот ги имаат нивните специфични потреби.
Марија Томеска/Еуролинк осигурување
Дали кризата влијае врз побарувачката за имотно осигурување?
М. Томеска: Кога е во прашање кризата, имотното осигурување треба да стане уште поактуелна тема. Имено, кризата веќе носи многу предизвици во оперативниот дел од работењето. Во вакви тешки моменти, ниту едно правно лице не може да си дозволи да биде изложено на дополнителни ризици што би можеле да го загрозат или целосно да го спречат работењето на компанијата. Имотното осигурување ги ублажува сите ризици по имотот на компанијата, со што му овозможува на бизнисот да се фокусира на суштината на својата работа и на подобрувањето на резултатите.
Токму затоа и сме сведоци на зголемен интерес за имотните осигурувања.
Кризните времиња се моментот кога секој бизнис, без оглед на големината, треба да си обезбеди континуитет во работењето преку склучување договор за осигурување што ќе ги покрие градежните објекти, залихата, опремата и прекинот на работа, затоа што имотот вреди повеќе само кога е осигурен навреме. Да нагласам дека треба да се обрне внимание и на квалитетот на покритието, на стабилноста на осигурителната компанија и на експертизата што ја поседува, затоа што кризните времиња се и момент кога бизнисите не може да си дозволат импровизација. Квалитетот на услугата и продуктите е тоа што е потребно со цел секое правно лице да може успешно да ги ублажи ризиците.
„Еуролинк“ осигурува проекти за енергија од обновливи извори. Што е специфично за овие проекти?
М. Томеска: „Еуролинк“ е првата компанија што обезбеди осигурително покритие за првите ветерници кај нас. Поточно, станува збор за осигурување на првите ветропаркови на локалитетите Богословец и Дрен во Демир Капија. Со осигурувањето само на овие две нови гринфилд (greenfield) инвестиции директно го поддржавме развојот на секторот за обновливи извори на енергија со негово зголемување за речиси 70 MWh.
Ваквата насока е дел од нашата заложба да го поддржиме развојот на овие проекти и со тоа да дадеме свој придонес и поддршка во ублажувањето на климатските промени како апсолутна неопходност.
Условот за да може да понудиме квалитетна понуда беше добро да ги разбереме новите ризици и технологијата, а клучна беше и нашата постојна соработка со светски познати реосигурувачи.
Испорачувањето проекти во ова поле подразбира големи инвестиции, а еден од одлучувачките фактори за реализација на проектната инвестиција е квалитетното осигурување, без кое не може да се обезбеди ниту финансиска поддршка за реализација на истите.
.webp){kind=icon}
