.webp){kind=icon}
„РедБрд Капитал Партнерс“ (RedBird Capital Partners) и „Отро Капитал“ (Otro Capital) ја предводат инвеститорската група која купува 24 проценти од Формула 1 тимот на „Рено“ (Renault SA, Alpine), во зделка која го вреднува бизнисот на 900 милиони долари, додека францускиот производител на автомобили напредува со амбициозните планови за својата единица спортски автомобили.
„РедБрд“, „Отро Капитал“ и „Максимум Ефорт Инвестментс“ (Maximum Effort Investments) ќе потрошат 200 милиони евра (218 милиони долари) на уделот во „Алпин Рејсинг“ (Alpine Racing Ltd.), ентитетот задолжен за активностите на „Алпин“ во Формула 1 со седиште во Енстоун, Велика Британија, објави „Рено“. „Блумберг“ објави за разговорите со „РедБрд“ и другите потенцијални партнери на 22 јуни.
„Алпин Рејсинг“, субјектот кој произведува Ф1 мотори во Вири-Шетлон (Viry-Châtillon), Франција, не е дел од трансакцијата и ќе остане во стопроцентна сопственост на „Рено“. „Алпин“ денеска во Енстоун ќе открие повеќе детали за инвестицијата и гамата на производи што следуваат. Таа ја потврди својата цел да достигне 8 милијарди евра приход во 2030 година.
Главниот извршен директор на Рено, Лука де Мео, се обидува да го подигне профилот на брендот во неговиот напор да го прошири бизнисот со спортски автомобили и да се движи кон електрификација, а напорите во Формула 1 се клучна точка на неговата стратегија. Откако го ребрендираше Формула 1 тимот на Рено како „Алпин“, Де Мео сега развива нова линија на модели, а брендот, најпознат по спортското купе А110, ќе стане целосно електричен од 2026 година.
Договорот ќе му овозможи на „Алпин“ да добие искусна група инвеститори. „РедБрд“, кој управува со капитал од 8,6 милијарди долари во повеќе сектори, вклучително и спортот, потрошувачките и финансиските услуги, го предводеше преземањето на Милан од 1,2 милијарди евра минатата година, а исто така е сопственик на францускиот фудбалски тим Тулуз ФК. Алек Шајнер, ко-основач и партнер на „Отро Капитал“ ќе се приклучи на одборот на директори на „Алпин“.
Инвеститорите се повеќе ги привлекува Формула 1, спорт чија популарност порасна во последните години. Според договорот, групата ќе и помогне на „Алпин“ да расте во области како што се медиуми, спонзорство, билети, угостителство, управување со комерцијални права, лиценцирање и стратегии за трговија.
Тимот на „Алпин“ минатата сезона заврши на четвртото место во поредокот на Формула 1, помагајќи да се зголеми видливоста и продажбата на брендот. Додека возачот Естебан Окон се најде на третото место на престижната трка за Големата награда на Монако минатиот месец, почетокот на овогодинешниот шампионат во Формула 1 беше потежок. Тимот моментално е петти во конструкторскиот поредок, зад „Ред Бул Рејсинг“, „Мерцедес“, „Астон Мартин“ и „Ферари“.
