Владата ќе го протне данокот на солидарност со европско знаме?

Јасна е намерата на Владата да го протне законот за данокот на солидарност со европско знаме, а тоа ќе донесе поголема штета отколку ќар, предупредува Стопанската комора на Македонија (СКМ).

„Клуб 100, како најрепрезентативно тело на раководење во Стопанската комора, ја повикува Владата на РС Македонија да го повлече предлогот на законот за данок на солидарност и со тоа да покаже сериозен однос кон укажувањето на најголемата и најмногубројна бизнис асоцијација во државата“, пишува во денешното соопштение.

„Носењето вакво законско решение за изминатата фискална година создава несигурност кај постојните и потенцијалните инвеститори, особено ако се има предвид дека правната сигурност е еден од врвните приоритети за кои се залагаме како застапувачи на интересите на бизнис-заедницата во земјата“, велат од комората.

 

Стопанска комора на Македонија

 

Стопанската комора на Северна Македонија, која ги застапува компаниите што создаваат половина од вкупниот приход во приватниот сектор, компании што генерираат речиси половина од нето-добивката во приватниот сектор и компании што вработуваат повеќе од една третина од вработените во приватниот сектор, денеска уште еднаш ги афирмира своите забелешки во однос на законското решение што Владата го усвои минатата година, а е во собраниска процедура од февруари годинава.

Според комората, законот има селективен пристап затоа што со него се опфатени само поголемите компании, кои остваруваат приход поголем од 615.000.000 денари.

„Се врши оданочување на добивката што ја оствариле компаниите, независно дали истата таа е резултат на пазарните услови (остварена екстра-добивка поради движења на пазарите на енергенти или други причини што довеле до конјунктурни поместувања на пазарот) или е резултат на нивното работење, односно резултат на зголемени инвестиции, подобрена продуктивност, освојување нови пазари и сл.“, велат од СКМ.

Со овој закон се врши дестимулирање на успешните компании, кои се инвестициски ориентирани, односно во неповолна положба се доведуваат компании што инвестирале во претходните години, сметаат оттаму.

„Ефектот што се очекува од неговата примена, во смисла на обезбедување дополнителни средства во државниот буџет, може да изостане за делот на добивката на компаниите што се корисници на државна помош, од причина што ќе се намали нивниот индивидуален износ на доделена државна помош, и по таа основа нема да се зголемат приходите во буџетот. Ваков данок, кој се носи ад хок, во втората половина на деловната година, создава несигурност кај постојните и потенцијалните инвеститори“, соопшти комората.