.webp){kind=icon}
„ТАВ аеродроми“, синоќа, 6 септември, на гала-церемонијата за време на годишниот форум и светски самит за искуство на клиентите на ACI во Инчон, Република Кореја, ја прими наградата за квалитет на аеродромските услуги „Ерпорт сервис квалити“ (Airport Service Quality–ASQ) за Меѓународниот аеродром Скопје за 2022 година, од Меѓународниот совет на аеродроми (Airport Council International World – ACI World).
Наградата во име на скопскиот аеродром ја прими главниот оперативен директор на „ТАВ аеродроми“, Куршад Коџак, кој исто така ги прими наградите и за аеродромите во Загреб и во Анкара со кои управува истата групација.
„Огромно е задоволството кога се препознаваат напорите, посветеноста и работата, особено кога таквото признание доаѓа директно од нашите клиенти, односно нашите ценети патници. ТАВ, како аеродромски оператор, заедно со сестринските компании, БТА (храна и пијалаци), АТУ (бесцарински продавници), ТАВ МОС (комерцијални услуги), ТАВ технолоџис (ИТ-услуги), Еуроклин (одржување хигиена), користи над 30 индикатори за ефикасност и квалитет во анкетните прашалници за квалитет на аеродромските услуги оценети преку мислењата на патниците, рангирањето и одговорите во однос на квалитетот на аеродромските услуги, за натамошно подобрување на услугите што се нудат на Меѓународниот аеродром Скопје“, изјави Неџат Курт, генералниот директор на „ТАВ Македонија“.
Неџат Курт/Меѓународен аеродром Скопје
Меѓународниот аеродром Скопје, покрај тоа што е награден како најдобар аеродром според својата големина и регион (од два до пет милиони патници годишно во Европа), исто така е награден и во категориите: аеродром со најпосветен персонал во Европа, најлесно аеродромско патување во Европа, најпријатен аеродром во Европа и најчист аеродром во Европа за 2022 година.
Меѓународен аеродром Скопје
Скопскиот аеродром осми пат ја добива оваа награда, по наградите ASQ што ги има добиено за 2021, 2020, 2019, 2018, 2015, 2013 и 2012 година.
Скопскиот аеродром спаѓа во панел за ASQ што се состои од аеродроми со големина од два до пет милиони патници годишно во Европа.
Програмата за квалитет на аеродромските услуги (ASQ) е светска водечка програма за мерење на искуството на клиентите на аеродромот и за креирање одредници. Споредено со други програми во воздухопловната индустрија, оваа програма се заснова врз истражување во живо, преку анкети собрани на аеродромот – директно од патниците – кои го оценуваат своето задоволство на денот на патувањето.
„ТАВ Македонија“, подружница на „ТАВ аеродроми“, членка на групацијата АДП, го заокружи периодот од јануари до јули 2023 година со вкупно 1.691.363 патници што патувале преку двата македонски аеродрома, Меѓународниот аеродром Скопје и аеродромот „Св. Апостол Павле“ – Охрид. Ова претставува пораст од 36 отсто споредено со истиот период во 2022 година, додека споредено со 2019-та, референтната година во авијацијата, статистиките во авиосообраќајот бележат 16 отсто зголемување на бројот на патници. Во однос на бројот на летови, во седумте месеци од 2023 година се реализирале 12.834 летови, или 21 процент повеќе од 2022-та, односно 5 отсто повеќе споредено со 2019 година.
