.webp){kind=icon}
Во петокот избувна синдикален бунт во фабриката на „Форд“ во Вејн, Мичиген, а истовремено започнаа штрајкови и против „Џенерал моторс“ и „Стелантис“, матичната компанија на „Крајслер“. Штрајковите против „детроитската тројка“ што произведува автомобили започнаа откако синдикатот и компаниите не успеаја да се договорат за нови договори.
Стотици луѓе, вклучувајќи ги и автомобилските работници во ноќна смена и нивните поддржувачи, се собраа во фабриката на „Форд“, додека членовите на синдикатот на Обединетите автомобилски работници (УАВ - UAW) ја напуштија работата за да започнат историски штрајк, пренесува Хина.
Во четвртокот извршниот директор на „Форд“, Џим Фарли, предупреди на мрачно сценарио доколку компанијата се согласи со барањата на синдикатот за зголемување на платите за 40 отсто, крај на системот за плати во чии рамки новите вработени се платени помалку од ветераните, како и враќање на стариот пензиски систем. Предлозите на УАВ „ќе нè исфрлат надвор од бизнисот“, рече тој.
Но претседателот на УАВ, Шон Фејн, рече дека „Форд“ би можел да финансира подобри плати и бенефиции за работниците доколку го ограничи откупот на акции и дивиденди за акционерите. „Форд“ објави дека во 2022 година им вратил 2,5 милијарди долари на инвеститорите.
Кога започна штрајкот, Деби Дингел, демократска конгресменка од Мичиген, беше меѓу истакнатите посетители на фабриката на „Форд“ во Вејн, каде што околу 3.300 члена на УАВ ги составуваат популарните теренци „бронко“ и „ренџер“.
„Јас сум тука само за да ги поддржам работниците“, рече Дингел.
„Тие сакаат да видат приспособувања според трошоците за живот. Тие работат на производствена лента. Тие работат на различни нивоа, но ја работат истата работа. Значи, тие сакаат да се ослободат од нивоата и сакаат безбедна работа“, додаде таа.
Фајн не исклучи подрастични акции, како што се големи штрајкови низ целата компанија, доколку не се постигне договор.
Еден од поддржувачите на штрајкувачите во фабриката, 38-годишен ветеран на „Џенерал моторс“, анонимно рече дека смета оти штрајковите нема да престанат додека производителите на автомобили не попуштат на синдикалните барања.
„Ние го заслужуваме тоа што го заслужуваме“, рече тој.
