.webp){kind=icon}
Нарачките во германските фабрики се зголемија трет месец по ред, што е ветувачки знак за производствениот сектор што е во понеповолна ситуација од услугите во најголемата европска економија.
Побарувачката во февруари се зголеми за 4,8 отсто споредено со претходниот месец, што претставува најголем раст од јуни 2021 година и е многу подобар резултат од просечната процена за пораст од 0,3 отсто во анкетата на „Блумберг“ спроведена меѓу економистите. Растот го предводат големите нарачки за возила, се вели во соопштението на германскиот завод за статистика.
Нарачки во фабриките во Германија / Bloomberg
Значително се зголеми и домашната побарувачка. Додека избледуваат тесните грла во испораките, кои се појавија за време на пандемијата, производителите страдаат од слабата побарувачка поради ниската доверба и намалената куповна моќ на потрошувачите.
Деловните истражувања на „Ес енд пи глобал“ (S&P Global) оваа недела укажаа на продлабочување на падот во март, иако некои компании ја искористија подобрата достапност на делови за да работат и да ги испорачаат заостанатите нарачки.
Германија, каде што производството игра огромна улога во економијата, е изложена на ризик од плитка рецесија откако производството се намали за 0,4 отсто во последните три месеци од 2022 година. Сè уште се филтрира и целосното влијание од зголемувањата на каматните стапки од страна на Европската централна банка (ЕЦБ). Сепак, постојат причини за оптимизам, вклучувајќи го и мерачот на очекувања на институтот ИФО (Ifo), кој на крајот од минатиот месец се искачи на највисоко ниво во период од една година. Производителите на автомобили беа меѓу фирмите што известија за подобрување на бизнисот.
