Германските фабрички нарачки опаѓаат додека привршуваат трговските пореговори со САД

Нарачките на германските фабрики се намалија за првпат по четири месеци бидејќи домашните компании се претпазливи кога станува збор за големи инвестиции додека не се реши неизвесноста околу трговијата со САД.

Побарувачката во мај се намали за 1,4 отсто во однос на претходниот месец, соопшти денеска статистичкото биро. Тоа е полошо од сите процени, освен една во анкетата на „Блумберг“. Сепак, на годишно ниво нарачките се зголемија за 5,3 отсто.

Производителите во најголемата економија на континентот со нетрпение ги чекаат резултатите од преговорите на Европа со САД. Помалку од една недела пред да истече рокот за склучување договор сигналите од Брисел сугерираат дека може да се избегнат казнени давачки. Исходот би можел да значи дека Германија ќе го врати растот - или ќе продолжи уште неколку тешки години без раст.

Bloomberg Mercury

 

Доколку разговорите бидат успешни, Бундесбанк предвидува дека економијата ќе се соочи со тешкотии годинава пред да постигне „значително“ закрепнување благодарение на трошоците за инфраструктура и одбрана. Се очекува производството да скокне за 1,2 отсто во 2027 година.

Но загриженоста околу трговијата ја намали довербата и ги принуди фирмите, вклучувајќи ги „Континентал“ (Continental) и „Мерк“ (Merck), да ги намалат своите прогнози. Други фирми, како што се „ЦФ Фридрихсхафен“ (ZF Friedrichshafen AG) и „Роберт Бош“ (Robert Bosch GmbH), отпуштаат работници и затвораат фабрики поради намалената побарувачка.

Нарачките за инвестициски стоки од Германија во мај се намалија за 12,7 проценти во однос на претходниот месец, при што вкупната домашна побарувачка кај фабриките се намали за 7,8 отсто. Нарачките од странство се зголемија за 2,9 проценти.

Постојат некои светли точки

Германското министерство за економија соопшти дека, и покрај забавувањето во мај, основниот тренд на индустриска побарувачка е „на растечка траекторија“, дури и додека нарачките остануваат нестабилни поради високата трговска и геополитичка неизвесност.

„Дури и ако деловните очекувања на компаниите сега повторно се подобрат, не може да се исклучи ново забавување на индустриската побарувачка во понатамошниот тек на годината“, се наведува во соопштението.

Иако мерачот на деловните услови во производството веќе три години укажува на контракција, фирмите полека го зголемуваат производството, надевајќи се дека владата наскоро ќе започне со стимулации.

Податоците за индустриското производство за мај треба да се објават на почетокот на следната недела и може да покажат контракција. Статистичките бројки од Франција, објавени денеска, открија неочекуван пад од 0,5 отсто во однос на претходниот месец. Само производството во индустријата падна за еден отсто, а уште поголеми се падовите во секторите рафинирање, електронски производи и автомобилска и фармацевтска индустрија.