Германија има проблем, и тоа многу поголем од царините на Доналд Трамп

Додека Доналд Трамп продолжува со својата кампања за промена на начинот на кој функционира светот, Германија е особено ранлива.

Трамп негува лутина кон Германија уште од својот прв мандат, а автомобилската и челичната индустрија во земјата се особено изложени на неговите царини.

Покрај тоа, решителноста на Трамп да ја намали воената поддршка за Европа ќе префрли огромен товар врз Германија, а отворената поддршка од неговиот кабинет на крајно десничарската Алтернатива за Германија предизвикува вознемиреност кај гласачите.

Но додека новиот канцелар Фридрих Мерц се подготвува за својата прва посета на Белата куќа денеска, неговиот најголем проблем може да биде домашен: многу Германци немаат сила за предизвиците што претстојат.

„Не се појавуваат многу нови работи, а тоа поттикнува песимизам“, рече Мелани Арнц, заменик-директорка на Институтот за истражување на вработувањата во Нирнберг. „Се соочуваме со вишок деструктивни сили“.

Инвеститорите наизглед се оптимистични за Германија. Референтниот индекс на акции се тргува блиску до рекорд, со пораст од околу 20 проценти годинава, додека превирањата во САД и бегството кон безбедни германски средства помогнаа еврото да ја зголеми вредноста за околу 10 отсто во однос на доларот.

Bloomberg Mercury

 

Но акциите со голема капитализација во Германија генерираат помалку од 20 проценти од своите вкупни приходи од домашниот пазар. Раководителите во индустриските центри на земјата се многу помали оптимисти за иднината.

Да го земеме за пример Карстен Фогт.

Педесетгодишниот сопственик на бизнис размислува да ја затвори „Ланген фојерунгсбау“ (Langen Feuerungsbau), производствената компанија што неговиот прадедо ја основал во 1930-тите, наместо да ја реконструира фирмата за да ја издржи сè понепријателската глобална економија. Семејната компанија на Фогт во Дисбург, лулката на германската челична индустрија, произведува противпожарни врати за постројки за електрична енергија, согорување отпад и биогас низ целиот свет. Но побарувачката се намалува бидејќи клиентите се префрлаат на нови технологии.

„Не планирам повторно да се реорганизирам со иновации во последната деценија од мојот работен век“, рече Фогт во едно интервју. „Двапати го поминав тоа и мислам дека е доволно. Исцрпувачки е“.

Bloomberg Mercury

 

Фогт ги опишува предизвиците за справување со промените и чувството на резигнација што се проткајува низ економијата околу Дисбург. Големите производители на челик во регионот, како „Тисенкруп“ (ThyssenKrupp), „Арчелор митал“ (ArcelorMittal) и ХКМ (HKM), веќе се соочуваат со масовни отпуштања, па дури и потенцијално затворање фабрики.

Германската индустрија доживеа забрзување на намалувањето на работните места и моментално губи околу 10.000 работни места месечно, вели Арнц. Во меѓувреме довербата на потрошувачите никогаш целосно не закрепна од двојниот удар на пандемијата и војната на Русија во Украина, невработеноста во мај скокна најмногу во речиси три години, а партијата на Мерц се бори на анкетите да го задржи своето водство пред Алтернатива за Германија (АфД) на анкетите.

Bloomberg Mercury

 

Агендата на Трамп „Америка на прво место“ би можела да го влоши сето тоа бидејќи претседателот има цел да ги казни земјите како Германија за она што тој го нарекува „нефер“ практики што ги искористуваат американските компании и работници. Децениите потпирање на извозот за поттикнување на растот значат дека ова би можело да предизвика проблеми за најголемата економија во Европа.

„Сакам германските автомобилски компании да станат американски автомобилски компании, сакам да ги градат своите фабрики тука“, рече Трамп за време на кампањата во септември.

Оттогаш тој продолжи да ја напаѓа германската влада, при што потпретседателот Џеј Ди Венс непосредно пред изборите се сретна со кандидатката на АфД, Алис Вајдел, а државниот секретар Марко Рубио ги нарече напорите за следење на екстремистичките групи „прикриена тиранија“.

Во услови на удар на неговата трговска политика, Европската Унија во моментов се соочува со царини од 50 проценти за поголемиот дел од извозот во САД, кои доколку не се постигне спогодба, треба да стапат во сила на 9 јули. Таа мерка ќе ги погоди германските производители на автомобили што минатата година во САД продадоа возила во вредност од 25 милијарди долари. Како одговор, „Мерцедес Бенц“ објави планови за преместување на производството на уште еден модел во Алабама.

Може да следуваат уште такви одлуки, а министерот за трговија Хауард Лутник вчера им кажа на сенаторите дека на состанокот со Трамп производителите на автомобили понудиле дополнителни инвестиции во Америка. САД испратија писмо до трговските партнери потсетувајќи ги дека очекуваат земјите да понудат отстапки пред рокот што го зададе Трамп (9 јули), а претседателот веќе презеде чекори кон удвојување на царините за челик и алуминиум, што претставува разочарување за европските лидери.

„Гледаме што прави Доналд Трамп“, рече Вернер Шаурте-Куперс, претседател на Трговската комора во Дисбург. „Нашите надежи сега се насочени кон германската влада и дека таа ќе покаже волја брзо да дејствува“.

Германското производство постојано опаѓа уште од крајот на 2017 година, а по шокот на цените на енергијата предизвикан од војната во Украина, целокупната економија во последните две години се намали.

Гласачите излегоа на избори во февруари, веднаш откако Трамп се врати на функцијата, со зголемено чувство дека хроничните проблеми се претвораат во вонредна состојба.

Bloomberg Mercury

 

Новиот период може да понуди „последна шанса“ за враќање на довербата на граѓаните „во политичките партии на нашата демократија“, рече Мерц по неговата изборна победа на која крајно десничарската АфД стана главна опозициска партија.

Мерц веќе доби поддршка за фонд од 500 милијарди евра за надградба на трошната германска инфраструктура и ги отстрани уставните ограничувања за задолжување за трошоците за одбрана, отворајќи го патот за стотици милијарди повеќе да се инвестираат во војската.

Дисбург, каде што Фогт има своја фабрика, е едно од оние места што илустрираат колку брзо Мерц треба да ги промени работите.

Bloomberg Mercury

 

Градот се наоѓа на западниот крај од областа Рур, каде што индустриите за јаглен и челик помогнаа во обновата на Германија по Втората светска војна. Но невработеноста сега е над 13 проценти, двојно повеќе од националниот просек, а многу од вработените работат во индустрии што се во изумирање со мрачни перспективи.

На северот од градот огромните станбени блокови изградени за работниците во челичарницата во 1970-тите станаа симбол на пропаднат град со висока стапка на криминал. Речиси една четвртина од гласачите во северниот дел на Дисбург ја поддржаа АфД на изборите во февруари, во споредба со 21 отсто од поддржувачите на таа партија на национално ниво.

Bloomberg Mercury

 

„Постои причина зошто ја имам мојата компанија во Дисбург, но не живеам во градот“, вели Хендрик Хојзер, сопственик на друг семеен бизнис.

„Хојзер“ (Häuser & Co) е индустриска фабрика што таткото на сегашниот сопственик ја одделил од компанијата „Тисенкруп“ (ThyssenKrupp) во 1995 година и почнал да се фокусира кон различни клиенти, обложувајќи се дека нема долгорочна иднина за производството на челик во Германија. Сега синот сведочи како тие предвидувања се остваруваат.

Bloomberg Mercury

 

„Многу работни места ќе бидат изгубени во следните три до пет години“, рече Хојзер Помладиот, кој патува во Дисбург од својот дом во регионот Долна Рајна. „Ако челичната индустрија во Дисбург пропадне, каде треба да одат луѓето? Нема друга компанија, нема друга индустрија“.

Семе за евентуално оживување на градот може да се види во растечката логистичка индустрија. Сместен на крајот од трансконтиненталниот железнички коридор што се протега до Кина и на вливот на реките Рајна и Рур, географијата на Дисбург му помогна на градот да го развие најголемото внатрешно пристаниште во светот.

Десет различни контејнерски терминали и 52.000 вработени минатата година претовариле еквивалент од 3,9 милиони контејнери од 20 стапки. Тоа е приближно 40 проценти од обемот што поминува низ Лос Анџелес, најголемото контејнерско пристаниште во САД.

Но Маркус Банген, главен извршен директор на операторот на пристаништето „Диспорт“ (Duisport), вели дека расположението е мрачно, а довербата е кревка кај многу од германските компании со кои соработува. По две последователни години со контракции, активноста се стабилизира во првите месеци годинава, а потоа стигна ударот од царинскиот хаос на Трамп. „Основната доверба беше уништена само за неколку дена“, рече Банген во едно интервју.

Bloomberg Mercury

 

Во фабриката „Ланген фојерунгсбау“, Фогт размислува за тоа како неговото семејство се снаоѓаше во претходните турбулентни периоди и се жали дека чувството на претпазливост ја кочи компанијата.

„Секогаш наоѓавме опции, но секогаш чекавме предолго за да направиме скок и да направиме нешто ново - затоа што секогаш се држиме до старите начини“, рече тој. „Ќе продолжиме да произведуваме вака колку што е можно подолго, а потоа веројатно ќе затвориме“.