Се намалуваат нарачките на германските фабрики, а со тоа и на македонските

Нарачките во германските фабрики опаднаа најмногу во последните три месеци, што дополнително ги истакна проблемите на индустријата на само неколку недели пред сè уште актуелниот канцеларот Олаф Шолц да се соочи со избори.

Побарувачката во ноември се намали за 5,4 проценти во однос на претходниот месец, а таквиот резултат е многу полош од падот од 0,2 отсто што го предвидуваа економистите во истражувањето на „Блумберг“. Тоа е поради падот на големите нарачки, соопшти националниот завод за статистика.

„Сè уште нема знаци за закрепнување на ситуацијата во германската индустрија“, рече Винсент Стамер, економист во „Комерцбанк“ (Commerzbank).

Промена на индустриското производство во Германија на месечно ниво Bloombeg Mercury

 

Производствениот сектор во Германија претставува проблем за пошироката економија уште од 2022 година, при што цикличните проблеми сè повеќе отстапуваат место на структурните проблеми, како што се недостигот на работници и високите трошоци за енергија. Економијата веројатно се намали во 2024 година, што всушност значи негативен раст втора година по ред, а германската централна банка, „Бундесбанк“ (Bundesbank), за оваа година предвидува враќање од само 0,2 отсто.

Таквата слабост е во фокусот на изборите, што ќе се одржат на 23 февруари, на кои најверојатно Шолц ќе биде заменет од Фридрих Мерц, кој го предводи главниот опозициски конзервативен блок ЦДУ/ЦСУ.

Мандатот на социјалдемократите, кој започна во 2021 година, беше нарушен со голем број прашања, вклучително и пандемијата, кризата со трошоците за живот по војната на Русија во Украина и слабата кинеска побарувачка за германски производи.

Новиот канцелар ќе се соочи со слични пречки за раст, плус заканата од американски царини што веројатно ќе се спроведат откако Доналд Трамп ќе се врати во Белата куќа кон крајот на овој месец, што се надополнува на веќе постоечките предизвици за најголемата европска економија.

Инаку, за четвртиот квартал од 2024 година економистите во моментов предвидуваат проширување од само 0,1 отсто, иако „Бундесбанк“ предупреди на веројатна стагнација.

Проблемите на автомобилските гиганти неминовно ги чувствуваат и нивните добавувачи

Јасно е дека големите европски производители на автомобили моментално се во тесно, а одличен спореден показател се перформансите на производителите на автоделови, нивните примарни доставувачи, сметаат аналитичарите на „Блумберг Адрија“.

За да се добие ценосна слика треба да се разгледаат најважните финансиски показатели на некои од најважните производители на автоделови, имајќи предвид дека тие се огледало на производството на автомобили трендови.

Нивните перформанси се релевантни и за регионот Адрија, бидејќи многу доставувачи ги поставија своите погони токму тука (најчесто темелно субвенционирани, со цел да привлечат странски директни инвестиции) и ги диктираат трендовите на регионалната индустрија за автоделови, посочија нашите аналитичари во својата анализа објавена минатиот месец.

„Глобалните перформанси неизбежно се прелеваат на субјектите во регионот, така што може да се направат паралели и да се извлечат заклучоци за нивното идно работење“, вели Илија Нешиќ, аналитичар од „Блумберг Адрија“, кој потенцира дека поради разочарувачките резултати, особено во четвртиот квартал од 2024 година, страдаат и производителите на автоделови.

Bloomberg Mercury

 

„Набљудуваната група се состои од производители на различни автоделови и вклучува доставувачи од прв ред за автомобилската индустрија. Во просек, нивните приходи се намалија за 3,9 отсто во третиот квартал од 2024 година во споредба со истиот период во 2023 година. Трендот на опаѓање на продажбата станува кристално јасен почнувајќи од втората половина на 2024 година, при што кај секој производител е забележан среден едноцифрен пад на приходите (во третиот кварталот во 2024 година во споредба со третиот квартал во 2023 година). Годината започна доста добро за играчите специјализирани за електроника, жици и кабли, но по првиот квартал на 2024 година, побарувачката се задуши поради намалениот интерес на потрошувачите, намалените субвенции за електрични возила, конкуренцијата од Кина, тензиите во меѓународната трговија и промените во миксот на производи. Меѓутоа, во текот на 2024 година, посериозно се погодени производителите на пофундаментални автоделови (компоненти за мотори, менувачи, како и компоненти за електрични и хибридни мотори, како и производители на седишта)“, се потенцира во анализата на експертскиот тим на „Блумберг Адрија“.

Како намалените нарачки се одразуваат на македонските фабрики?

Сето горенаведено де факто се одразува на работењето на македонските добавувачи на автоделови, кои одамна алармираат на намалени нарачки, кај некои дури и до 30 отсто. Згора на тоа, неизвесноста околу кризата во автомобилскиот сектор не дава многу оптимизам дека бројките значајно ќе се поправат во наредниот период. Напротив, последиците кај добавувачите на големите европски производители на автомобили се очекува допрва да дојдат до израз.

„Ефектот од падот на побарувачката за електрични автомобили (и општото забавување во автомобилската индустрија) ќе се почувствува на регионално ниво во следните две-три години. Првите знаци ќе бидат видливи и во финансиските извештаи за 2024 година. Новите мерки за ограничување на трошоците исто така имаат потенцијал да се пресликаат во регионот. Ќе се очекува дисциплина на трошоците од субјектите што работат овде, и покрај помалите оперативни трошоци и субвенции“, се посочува во анализата на „Блумберг Адрија“.

Bloomberg Mercury

 

Ние неодамна пишувавме и за прогнозите на рејтинг агенцијата „Фич“ (Fitch Ratings), која за годинава го оценува како неутрален автомобилскиот сектор во светски рамки. Се очекува раст на овој пазар од само два отсто на глобално ниво со пригушени цени поради големата конкуренција.

„Неутралните изгледи за глобалниот автомобилски сектор ги одразуваат нашите очекувања за стабилна производствена средина, при што глобалната продажба на лесни возила се предвидува да се зголеми за околу два отсто. Овој раст ќе биде нерамномерно распределен низ регионите, бидејќи европските и кинеските пазари се соочуваат со макроекономски предизвици. Очекуваме цените да останат пригушени поради ескалацијата на конкуренцијата“, пишува во образложението на „Фич“.

Дел од текстот го напиша Зое Шневајс од „Блумберг“.

 

Во моментов нема коментари за веста. Биди прв да коментира...

Остави коментар