Очекувањата за раст на германските компании во 2025 пркосат на кризата

Претстојните избори, зголемената невработеност и кризата во автомобилската индустрија можеби не одговараат на рецептот за успех за германските компании оваа година, но погледот на проекциите за заработка кажува поинаква приказна.

Компаниите кои го сочинуваат германскиот индекс DAX се очекува да испорачаат раст на заработката по акција од повеќе од 10 проценти во 2025 година, што е најмногу меѓу европските конкуренти, покажуваат податоците собрани од „Блумберг интелиџенс“ (Bloomberg Intelligence). Индексот кој е составен од 40 компании, кој ги вклучува производителите на автомобили БМВ (BMW AG), „Мерцедес“ (Mercedes-Benz Group AG) и „Фолксваген“ (Volkswagen AG), е единствениот европски репер за кој се гледа дека носи двоцифрен пораст. Тоа е повеќе од просекот од 7,1 отсто предвиден за поширокиот Stoxx Europe 600 индекс и над очекуваните 8,8 проценти за францускиот индекс CAC 40.

„Голем дел од растот ќе зависи од закрепнувањето во економски чувствителните циклични сектори и, најважно, оптоварената автомобилска индустрија во Германија, поради што прогнозите за толкав раст можеби нема да се остварат до втората половина“ предупредуваат стратезите за капитал на „БИ“ (BI), Каиди Менг и Лоран Дује, укажувајќи на ризиците кои ги вклучуваат високата изложеност на Кина на германската автомобилска индустрија, предвремените избори во февруари и спроведувањето на потенцијалните американски царини по доаѓањето на Доналд Трамп, кој треба да биде инаугуриран како претседател н 20 јануари.

Се очекува германскиот индекс да го предводи европскиот раст Bloomberg Mercury

 

Аналитичарите очекуваат дека лавовки удел во растот ќе имаат „Дојче банк“ (Deutsche Bank AG), инженерскиот гигант „Сименс“ (Siemens AG), производителот на софтвер „САП“ (SAP SE), производителот на спортска опрема „Адидас“ (Adidas AG) и производителот на луксузни автомобили „Порше“ (Porsche AG), иако остануваат многу неизвесности.

„Подолгорочно, германскиот бдп (бруто домашен производ) се соочува со ризик од уште една година на намалување, така што јасноста на владиното раководство и посветеноста на фискалната експанзија ќе бидат клучни за заживување на забавената економија и вреднувањето на DAX“, посочуваат стратезите.

Изборите, кои се закажани на 23 февруари, може да доведат до формирање на нова влада откако канцеларот Олаф Шолц ја повлече во ноември трипартиската коалиција предводена од неговите социјалдемократи. Според најновиот извештај на „Блумберг“, конзервативниот блок ЦДУ-ЦСУ води во анкетите со поддршка од речиси 33 отсто од гласачите. Екстремно десничарската партија Алтернатива за Германија, или АфД, е на второ место со 18 проценти, а социјалдемократите заостануваат на третото место со 16 отсто.

Политичарите досега не успеаја соодветно да одговорат за заживување на нестабилната економија на Германија, за која Бундесбанката предвидува едвај да расте во 2025 година, откако лани се намали.

„Вајлд-карта е ако изборите понудат одреден потенцијал за ублажување на правилата за задолжување“, рече минатиот месец аналитичарката на „ЏП Морган“ (JP Morgan), Софи Ворик, повикувајќи се на самонаметнатата граница за задолжување на Германија, наречена „сопирачка за долгот“.

Позитивно изненадување, според аналитичарите на „Берклис“ (Barclays), би била владина политика на повисоки трошоци и раст во Берлин.

Очекуван раст по сектори на годишно ниво во Германија Bloomberg Mercury

 

„Надежите дека проблематичните сектори би можеле да се вратат по тешката 2024 година ги отсликуваат сличните очекувања на поширокиот европски пазар на акции, кој сè уште заостанува во САД. И покрај тоа што индексот Euro Stoxx 50 може да покаже раст на заработката од 7,5 проценти по минатогодишниот пад од четири отсто, тоа ќе бара закрепнување во цикличните сектори како што се потрошувачката, енергијата и технологијата, како и континуиран раст во индустријата и финансиите“, изјавија Менг и Дује од „БИ“.

„Во однос на економскиот раст, Европа, а особено нејзиното француско-германско срце, моментално е и ќе остане најслабата алка во 2025 година“, напишаа во декември стратезите на „Одо“ (Oddo BHF), предводени од Томас Зловодски.

Дел од аналитичарите почнаа да ги намалуваат своите очекувања за раст во Европа во 2025 година. Bloomberg Mercury

 

Некои аналитичари почнаа да ги намалуваат своите очекувања за раст на заработките во Европа за 2025 година.

„Веруваме дека акциите во еврозоната ќе продолжат да се борат, и во апсолутна и во релативна смисла, уште некое време. Од позитивната страна, проценката на вредностите и позиционирањето се веќе намалени, а тоа може да доведе до одредено закрепнување откако ќе се сварат ризиците од царините, заработувачките и геополитичките ризици“, рече Ворик од „ЏП Морган“.

Во моментов нема коментари за веста. Биди прв да коментира...

Остави коментар