Со „карта на можности“ до работа во Германија дури и без познавање на јазикот

Германија, најголемата европска економска сила, во последните години се соочува со сè поголема потреба од работници. Според најновата анализа, за која што „Блумберг Адрија“ веќе пишуваше, земјата до 2040 година на годишно ниво ќе има потреба од најмалку 288.000 работници, и тоа во најдоброто сценарио, во кое жените и постарите луѓе што се веќе таму би работеле подолго. Ако тие претпоставки не се остварат, можеби ќе бидат потребни дури 368.000 доселеници годишно за да се спречи значително намалување на работната сила и осакатување на германскиот економски раст.

Токму од тие причини Германија во последниот период значително ги олеснува процедурите за привлекување работна сила од странство. Особен интерес има за работниците од земјите кои не се членки на ЕУ, вклучително и државите од Западен Балкан, од каде работниците по традиција на печалба одат токму во таа земја, како една од најпривлечните.

Германија има ниска стапка на невработеност и бројни работни можности, а привлекува баратели на работа од целиот свет. Германија нуди многу предности, вклучувајќи 24 дена платен годишен одмор, како и минимална саатница која изнесува 12,41 евра, а платата може да биде повисока во зависност од секторот и работното искуство.

Од 1 јуни годинава, Германија го удвои бројот на годишни работни визи за земјите од Западен Балкан на 50.000. Овие мерки, заедно со воведувањето на картата на можности, отворија повеќе шанси за граѓаните на Македонија да се вклучат на германскиот пазар на труд.

Карта на можности-нова шанса за вработување во Германија

Со повеќе од милион отворени работни места и недостаток на квалификувана работна сила, особено во секторите здравство, инженерство, ИТ и трговија, Германија во јуни годинава ја воведе „Ченскарте“ (Chancenkarte), или т.н. карта на можности. Оваа нова програма им овозможува на квалификуваните работници од земји кои не се членки на ЕУ да престојуваат во Германија до една година додека бараат работа.

Според информациите од порталот Germany-Visa.org, карта на можности е дозвола за престој што им овозможува на граѓаните на земјите надвор од ЕУ да престојуваат во Германија до една година за да најдат работа. За разлика од шестмесечната виза за барање работа, оваа дозвола овозможува подолг престој и можност за работа со скратено работно време или пробни работни места (до 20 часа неделно).

Дополнително важно е да се напомене дека за да се добие виза за работа потребно е минимум Б1 ниво на познавање на германски јазик, додека за да се добие нововоспоставената карта на можности не е задолжително познавање на германскиот, туку како алтернатива се бара англискиот јазик. Поточно, кандидатот е доволно да има А1 ниво на знаење на германски или Б2 ниво на познавање на англиски јазик.

Картата на можности овозможува едногодишен престој без претходно да се има понуда за работа, договор или семејни врски, како основ за добивање дозвола за престој. Таа се добива врз основа на системот за бодови.

Друга важна разлика е што барателите на работа може да добијат виза единствено со аплицирање директно во амбасадата на Германија, додека за картата на можности може да се аплицира онлајн, а право на аплицирање имаат дури и лица кои веќе по некој основ се на германска територија.

Што е потребно за вработување во Германија?

За да се квалификуваат за картата на можности, кандидатите треба да ги исполнуваат следниве критериуми:

• Јазично познавање: Ниво А1 на германски или ниво Б2 на англиски јазик.
• Квалификувано образование: Најмалку две години стручно образование или призната универзитетска диплома.
• Доволни финансиски средства: Најмалку 1.027 евра месечно за покривање на трошоците за живот за време на престојот.
• Систем за бодови: Најважниот критериум кој подразбира освојување шест бодови врз основа на образование, возраст, јазични вештини и работно искуство.

Од друга страна, важно е да се нагласи дека визата за барање работа и картата на можности во Германија се разликуваат во следниве клучни аспекти:

Квалификации: Визата за барање работа бара универзитетска диплома или признато стручно образование, додека картата на можности бара најмалку две години стручно образование и релевантно работно искуство.

Времетраење на визата: Визата за барање работа важи до шест месеци, додека картата на можности може да трае до една година.

Дозвола за работа: Визата за барање работа не дозволува никаква работа за време на траењето, додека картата на можности дозволува работа со скратено работно време (до 20 часа неделно).