Германија во наредниот период ќе има потреба од 288.000 работници годишно

На германската економија ќе ѝ требаат стотици илјади имигранти годишно за да се спротивстави на негативното влијание од стареењето на општеството, покажува новата студија, која поттикнува сè пожешка дебата за ова прашање.

Во извештајот на фондацијата „Бертелсман штифтунг“ (Bertelsmann Stiftung), објавен денеска, се наведува дека до 2040 на годишно ниво ќе биде потребен прилив од 288.000 работници, и тоа во сценарио во кое жените и постарите луѓе што се веќе таму да почнат да работат подолго. Ако тие претпоставки не се остварат, можеби ќе бидат потребни дури 368.000 доселеници годишно за да се спречат значително намалување на работната сила и осакатување на германскиот економски раст.

Инаку, просечната нето-миграција во деценијата до 2023 година изнесува околу 600.000, вклучувајќи ги тука скоковите поради војните во Сирија и во Украина. Деценијата пред тоа, пак, бележеше просечен прилив од околу 136.000 доселеници годишно, покажуваат пресметките на „Блумберг“ врз основа на бројките на статистичката агенција „Дестатис“ (Destatis).

Bloomberg Mercury

„Демографските промени, кои ќе претставуваат голем предизвик за германскиот пазар на трудот во наредните години со пензионирањето на бебибумерите, исто така бараат доселување. Се разбира, приоритет мора да му се даде на развојот на потенцијалот на домашната работна сила, како на домашното население, така и на тие што веќе имигрирале. Но тоа само по себе нема да биде доволно за да се задоволи идната побарувачка за работна сила до 2040 година“, изјави Сузане Шулц, експертка за миграција во фондацијата „Бертелсман“.

Извештајот доаѓа во момент кога Германија се соочува со предвремени избори на почетокот на следната година, а долготрајната стагнација на економијата и миграцијата се двете клучни теми во политичките кампањи. Екстремистичките партии од десната и левата страна, кои повикуваат на строги ограничувања за странците, бележат силен раст во анкетите по брановите бегалци со кои земјата се соочи во последните години.