Автомобилските гиганти се подготвуваат за уште една тешка година во индустријата

„Фолксваген“ (Volkswagen AG) и „Стелантис“ (Stellantis NV) се соочуваат со болни намалувања по бурната 2024 година со длабоки, структурни промени кои ја преобликуваат европската автомобилска индустрија. И следните 12 месеци не изгледаат ништо полесно.

Аналитичарите стравуваат дека се наѕираат повеќе проблеми и укажуваат на потенцијалните потешкотии од целосната трговска војна со САД кога Доналд Трамп ќе се врати во Белата куќа следниот месец. Ако извозот на важниот американски пазар биде погоден, тоа само би го зголемил и онака големиот притисок за намалување на трошоците во обид да се спречи дополнително еродирање на профитот.

Декември веќе се покажува како предвесник за масакрот што претстои. „Стелантис“ го смени својот главен извршен директор Карлос Таварес, а „Фолксваген“ изброја речиси 100.000 работници кои ги напуштаат фабриките поради плановите за досега невидени кратење, со цел да го направат производителот на автомобили конкурентен. Со четвртата рунда разговори, закажани за 9-ти декември, засега нема многу индикации дека раководството на „Фолксваген“ и работничките лидери се блиску до договор.

„Индустријата се соочува со речиси совршена бура. Притисокот на цените, загубите на пазарниот удел во Кина, построгите регулативи за ЦO2, ризикот од тарифи и континуираната слаба побарувачка веројатно дополнително ќе ги намалат приходите во секторот и покрај интензивирањето на напорите за реструктуирање“, велат аналитичарите на групацијата УБС (UBS Group AG), предводени од Патрик Хумел.

Bloomberg Mercury

 

Како клучен работодавач низ Европа, автомобилската индустрија беше секторот со најлошо работење досега оваа година. Дури и со проценките на компаниите, кои се за околу 30 проценти под историските просеци, инвеститорите се претпазливи бидејќи и натаму е неизвесно дали наскоро ќе дојде до пошироко и одржливо враќање на пазарот.

„Сè додека не е видлив крајот на циклусот на кратења, секое потенцијално отскокнување од сегашните ниски нивоа најверојатно ќе биде краткотрајно“, велат од УБС.

Институтот „Ифо“ (Ifo), еден од најпознатите германски центри за економски истражувања, во голема мера го дели мислењето на УБС, велејќи во неодамнешниот извештај дека расположението во автомобилската индустрија на нацијата бргу се влошува.

Автомобилската индустрија долго време беше поттикната од полните книги за нарачки по ковид пандемијата, но тесните грла во ланците за снабдување ги оставија производителите без доволно полупроводници за да ја задоволат побарувачката. Сега тие недостатоци се намалуваат, а со стагнирањето на побарувачката за електрични возила и неуспехот за поголем раст во Кина, производителите на автомобили останаа со вишок капацитети, смета Анита Волфл, експерт во институтот „Ифо“.

Како резултат на тоа, производителите мора да „прикочат“. „Форд“ (Ford Motor Co.) планира до крајот на 2027 година да намали околу 14 проценти од својата европска работна сила, првенствено во Германија и Велика Британија, додека германските производители на луксузни автомобили „Мерцедес“ (Mercedes-Benz Group AG) и „Порше“ (Porsche AG) се обидуваат да ги намалат трошоците.

Падот во германската автомобилска индустрија се рефлектира низ целиот ланец на снабдувачи

Падот се бранува низ целиот ланец на снабдување. „Роберт Бош“ (Robert Bosch), „Континентал“ (Continental) и „ЗФ Фридрихсхафен“ (ZF Friedrichshafen) заедно најавија укинување на околу 20.000 работни места на нивниот домашен пазар во Германија, каде производителите на автоделови се клучен дел од економијата. „Шефлер“ (Schaeffler AG) планира да затвори две локации за да заштеди пари и ќе скрати или премести илјадници работници.

Германската економија е на чекор до негативен раст втора година по ред Bloomberg Mercury

Македонските фабрики кои се снабдувачи на германските автомобилски гиганти не се нималку исклучок од целата состојба. Дел од нив веќе алармираат дека нарачките им се намалиле за речиси една третина, а неизвесноста во секторот ги зголемува стравовите за продлабочување на кризата и зголемување на последиците за сите чинители. Повеќе за состојбата со македонската автомобилска индустрија читајте на овој линк.

Негативните ефекти од германската криза се видливи и во најновите статистички податоци за надворешната трговија на земјава. Имено, вчера Државниот завод за статистика објави дека извозот од Македонија во Германија, која инаку е нашиот најголем трговски партнер, во периодот од јануари до октомври годинава е за 13,5 проценти помала споредено со истиот период лани. Тоа во апсолутна бројка значи пад на извозот од дури 351,4 милиони евра. „Блумберг Адрија“ пишуваше подетално и за ова, па целата анализа ја има овде.

Загубите на работни места во автомобилската индустрија во Германија придонесуваат за мрачна слика за оваа најголемата европска економија, која годинава продолжи да стагнира со намалување во производствениот сектор. Фабричките нарачки повторно паднаа во октомври, иако помалку отколку што предвидуваа економистите. Сè уште има малку конкретни докази дека на повидок е значајно, одржливо економско закрепнување, особено во автомобилскиот сектор.

Анализата на состојбите во автомобилскиот сектор во Германија ја пишуваа Кристоф Ројвалд и Моника Рејмонт.