Проблемите на германската автомобилска индустрија се одразуваат и во статистиката. Барем така покажуваат податоците од индексот на деловна клима во германската автомобилска индустрија, кој во ноември падна на -32,1 поени, додека во октомври изнесуваше -28,6 поени, покажуваат податоците на германскиот институт Ифо (Ifo).
Податоците исто така покажуваат дека компаниите во секторот се уште попесимистични во однос на изгледите за следните шест месеци. Индикаторот за деловна состојба се намали на -33,9 поени во споредба со -29,0 поени во претходниот месец. Слично се намали и индикаторот за деловни очекувања, кој падна на -30,4 поени, откако во октомври изнесуваше -28,2 поени.
Намалување на нарачките
„Индустријата е заглавена во миксот од далекосежна трансформација, силна конкуренција и слаба економија“, го коментираше објавувањето на податоците Анита Вулфл од Ифо. Мрачното расположение е пред сè резултат на слабата побарувачка: „Планината на нарачки што компаниите во автомобилската индустрија ја акумулираа од почетокот на 2021 година поради пандемијата и проблемите во синџирите на снабдување е обработена. Новите нарачки доаѓаат, но не се доволни за да се обезбеди целосна искористеност на капацитетите“, ги сумира Вулфл главните проблеми на индустријата.
Намалена побарувачка за кадри
Најавените отпуштања во големиот „Фолксваген“ и неговите доставувачи се одразуваат и во сè помалата побарувачка на кадри. И покрај тоа што индикаторот за очекувано вработување се зголеми во споредба со претходниот месец, сепак се намали на долгорочно најниско ниво од -34,1 поени. „Многу компании во автомобилската индустрија се претпазливи во однос на нови вработувања или размислуваат за намалување на бројот на работните места“, објаснува Вулфл.
Добра вест: Зајакнување на доларот
Компаниите опфатени со анкетата беа песимистични и во однос на работењето со странство во наредните месеци. „Компаниите сè уште чекаат да видат како ќе се развива трговската политика во однос на САД“, рече Вулфл. Сепак, вредноста на американскиот долар значително се зголеми по изборите, што би можело да им користи на извозниците во автомобилската индустрија во справувањето со намалената побарувачка на домашните европски пазари.
.webp){kind=icon}
