Пад на извозот од Македонија во Германија за 13,5 проценти

Германија е најголемиот трговски партнер на земјава, но со оглед на тоа што веќе втора година се бори со економски контракции, што подразбира намалено индустриско производство, пред сė во автомобилскиот и енергетскиот сектор, тоа де факто се одразува и на трговската размена со Македонија.

Имено, Државниот завод за статистика (ДЗС) денеска објави дека од јануари до октомври годинава, споредено со истиот период лани, индексот на трговска размена меѓу овие две држави бележи пад од 8,7 отсто, што во апсолутна бројка значи намалување од дури 351,4 милиони евра. Притоа, извозот од Македонија во Германија е намален за 13,5 проценти, додека увозот е зголемен за 6,9 отсто.

За прелевањето на последиците од кризата во најголемата европска економска сила врз македонските фабрики читајте на овој линк.

 

 

Но надворешната трговија е намалена и со другите два најголеми трговски партнера на земјава, Велика Британија и Грција. Обемот на трговска размена со Британија на годишно ниво бележи пад од 11,1 отсто, а во однос на Грција процентуалниот пад е 7,8 отсто. 

 

 

Инаку, вкупниот обем на трговска размена на земјава со странство за еден месец е зголемен за 9,9 проценти, додека на годишно ниво е намален за 0,1 отсто. Притоа, извозот во октомври споредено со претходниот месец е зголемен за 4,8 проценти, а увозот пораснал за 13,8 отсто.

Во моментов нема коментари за веста. Биди прв да коментира...

Остави коментар