Се прелева ли кризата? Извозот за Германија се намали за 380 милиони евра

Стоковната размена со странство бележи значаен пад во септември и споредено со истиот месец лани обемот на трговија е намален за девет отсто, покажуваат податоците од Државниот завод за статистика (ДЗС). Пад се забележува и кај извозот и кај увозот на стоки, при што извозот е намален за девет отсто, а увозот за 8,9 проценти.

Пресметано кумулативно за деветте месеци (јануари-септември) годинава, а споредено со истиот период лани, трговската размена со странство опаднала за 2,9 проценти, каде што извозот е во поголем минус од 6,1 отсто, додека увозот е речиси непроменет, поточно бележи мал пад од 0,5 отсто.

 

 

Најголем процентуален пад на обемот на трговска размена ДЗС пресмета со Белгија (-40,3 проценти), САД (-13,4 проценти), Велика Британија (-11,1 отсто), Германија (-8,5 отсто) и Грција (-8,0 отсто). Но, пресметано во апсолутна вредност, падот на трговската размена е највидлив со Германија, каде што вкупниот обем опаднал за 306,5 милиони евра. Притоа, важно е да се напомене дека увозот оттаму е зголемен, и тоа за девет отсто, односно за нешто над 74 милиони евра, додека доста голем е минусот кај извозот од земјава кон најголемата европска економска сила. Имено, во периодот јануари-септември годинава, споредено со истите месеци лани, извозот од Македонија во Германија бележи пад од 13,7 проценти, односно во апсолутна бројка е намален за 380,8 милиони евра.

Кризата во Германија неминовно се одразува и на македонската економија, со оглед на тоа што таа држава е најголемиот економски партнер на Македонија.

Германија се соочува со проблеми на повеќе економски фронта, но најзагрижувачка во моментов е кризата во автомобилската индустрија. Имено, најголемиот европски производител на автомобили, „Фолксваген“ (Volkswagen), планира да затвори најмалку три свои фабрики во својата матична земја, а најави и намалување на платите на своите вработени за да се справи со големите трошоци и да стане поконкурентен на пазарот во услови на силна конкуренција од кинеските производители на автомобили. Се чини дека Германија ја губи битката со конкуренцијата од Кина  и во делот на авиосообраќајот, како и во индустријата со ветерници, па економските субјекти веќе извесно време алармираат до владата да донесе соодветни мерки за да ги заштити од, како што велат, нелојалната конкуренција од Кина.

Сепак, автомобилската криза е таа што индиректно се одразува на македонските компании што се снабдувачи за германските производители.

„Блумберг Адрија“ веќе пишуваше за тоа дека се намалуваат нарачките на македонските фабрики за автокомпоненти, кои имаат најголем удел во вкупниот извоз за Германија од земјава. Голем дел компании што произведуваат автомобилски делови и компоненти се во целост зависни од нивните клиенти. Тие немаат производство за генералниот пазар, туку работат по конкретни нарачки од клиентите, за точни компоненти.

Дека последиците допрва позначајно ќе се почувствуваат посочи и премиерот Христијан Мицкоски во рамките на своето излагање на првата годишна конференција на „Блумберг Адрија“, која се одржа минатата недела во Скопје.

„Тоа што се случува во Германија во моментов нема веднаш да се почувствува во земјава, но веќе во вториот квартал следната година може да доведе до негативни ефекти, не само во земјава туку на глобално ниво“, рече премиерот, додавајќи дека од тој аспект, јасно е дека на земјава ѝ е потребна диверзификација на извозот, но тоа не може да се случи во краток рок.

Од друга страна, според податоците од ДЗС, трговската размена на земјава во проценти најмногу се зголемила со Чешка (28,7 отсто), Франција (21,8 отсто), Бугарија (19,1 отсто), Полска (16,1 отсто) и Словачка (13,4 отсто).