Новиот стрес во Германија има висока цена во Македонија

По економската, Германија влегува и во политичка криза. Канцеларот Олаф Шолц е под притисок да ја напушти идејата за избори во март и да се согласи тие да се одржат во јануари следната година.

За брзи избори е и неговиот коалициски партнер Роберт Хабек, кој во моментов е министер за економија. За брзи избори се и гласачите. Две третини од нив во последната анкета се изјасниле за поскоро одржување на изборите. Лобистите на германската индустрија исто така бараат предвремени избори, затоа што, според нив, на земјата очајно ѝ е потребна политичка стабилност.

„Наместо да ја води земјата во овие тешки времиња, канцеларот го пушта воланот. Секој дополнителен ден со оваа власт е изгубен“, изјави Дирк Јандура, претседател на лоби-групата што го претставува германскиот извозен сектор, пренесе „Блумберг“.

Анкетите во Германија во моментов му даваат силна предност на опозицискиот лидер Фридрих Мерц од демохристијанската ЦДУ/ЦСУ. Тој вели дека барањето на Шолц за одложување на изборите до март е неодговорно, имајќи предвид дека на најголемата европска економија итно ѝ се потребни дополнителни мерки за да го врати растот.

 

Bloomberg

Буџетот за 2025 година е јаболко на раздорот

Причина за политичката криза во земјата е буџетот за 2025 година, односно задолженоста. Сега веќе разрешениот министер за финансии Кристијан Линднер се противеше на натамошни задолжувања. Шолц изјави дека „премногу често Линднер блокираше решенија, премногу често ја злоупотребуваше мојата доверба“.

Шолц тврди дека на Германија ѝ треба „поголем финансиски простор“ за да се справи со тешкотиите со кои се соочува. „Ситуацијата е сериозна. Има војна во Европа, зголемување на тензиите на Блискиот Исток, економијата стагнира“, рече Шолц. „На компаниите им е потребна поддршка сега“.

За разлика од него, Линднер смета дека Германија треба строго да се држи до правилата што го ограничуваат новото задолжување.

Германскиот буџет е оптоварен, меѓу другото и поради поддршката на Украина во војната со Русија, вели во изјава за „Блумберг Адрија“ Синиша Наумоски, професор на институтот на бизнис и менаџмент „Хајделберг“ во Скопје.

„Досега Германија ѝ дала на Унгарија воена помош во висина од 30 милијарди евра. Земјата прими и бегалци од Украина, кои ја чинат 12 милијарди евра. Вкупно, цената на украинската криза за Германија е 42 милијарди евра, што е голема сума за поднесување“, објаснува Наумовски.

Изборот на Трамп е нова неволја за Германија

Политичката криза во Германија, според многу аналитичари, носи нестабилност и на европско ниво, особено по победата на Доналд Трамп на изборите во САД. Во првиот мандат на Трамп токму Германија и Франција беа негова противтежа.

Сега Трамп најавува преиспитување на обврските кон НАТО, промена на политиката за поддршка на Украина и воведување тарифи за стоките што во САД доаѓаат од Европската Унија.

Аналитичарите на „Економист“ пресметаа дека Германија е најзагрозената европска земја поради изборот на Доналд Трамп. Според нивниот индекс на ризик, Германија е на високото трето место на глобалната листа на земји што ќе ги почувствуваат ефектите од најавените политики на новата администрација на Трамп. Особено имајќи ги предвид најавените трговски војни и царини и намалувањето на американската воена поддршка за Европа.

Bloomberg

Американските царини најтешко би ѝ паднале на Германија

Евентуалните царини од 20 отсто што ги најавува новоизбраниот американски претседател може дополнително  да влијаат негативно на германската економија, која од пандемијата наваму не може да закрепне.

Германската економија се соочува за забавен раст. Во третиот квартал земјата избегна рецесија, но БДП оствари низок раст од само 0,2 отсто, а податоците за претходните три месеци беа остро ревидирани надолу. Компании чувствуваат притисок од скромната потрошувачка, што влијае на намалување на производството.

Во септември, според германската статистичка служба Дестатис, производството падна за 2,5 отсто на месечно ниво. Овој резултат е над очекувањата. Пад има и во автомобилската и во хемиската индустрија - столбовите на германската економија.

Извозот во САД во септември порасна за 4,8 отсто, а вкупниот извоз кон САД претставува околу 3,8 отсто од германскиот БДП. Овој процент ќе се намали ако Трамп ја спроведе заканата за воведување царини за европските производи.

Автомобилската индустрија во земјава годинава е во минус

Близу половина од македонскиот извоз завршува во Германија. Вредноста на македонскиот извоз расте веќе цела деценија, а главно се должи на новите инвестиции од автомобилскиот сектор што произведуваат компоненти за германските фабрики.

„Политичката криза во Германија само ќе ја продлабочи економската криза и, секако, ќе има негативни влијанија и импликации за македонската економија со оглед на силната економска и трговска врска помеѓу двете земји, а секако Германија како една од најголемите економии во ЕУ може дополнително да влијае врз европската економија, што на ниту еден начин не ѝ е во прилог на нашата земја како силно економски и трговски интегрирана кон ЕУ“, вели за „Блумберг Адрија“ професор д-р Дарко Лазаров, претседател на клубот на извозници при Стопанската комора на Македонија

Сегашната криза во германската автомобилска индустрија веќе се пресликува во македонските статистички податоци.

Имено, во периодот јануари-септември годинава, споредено со истите месеци лани, извозот од Македонија во Германија бележи пад од 13,7 проценти, односно во апсолутна бројка е намален за 380,8 милиони евра.

Не е сѐ така црно, но на компаниите им треба поддршка

Сепак, Лазаров вели дека ако се анализира по сектори, падот е кај автомобилскиот сектор, а во другите сектори има позитивни бројки.

„Во првите девет месеци од годината земјава бележи позитивен раст на извозот во повеќе дејности. За илустрација, раст на извозот од 40 милиони евра или за 11,5 отсто е забележан кај примарно земјоделство и храна, 20 милиони евра или 11,1 отсто е забележан раст на извозот на тутун и пијалаци, раст на извозот за повеќе од 100 милиони евра или за повеќе од 6 отсто е забележан во секторот машинство и транспортни уреди. Истовремено, раст на извозот има во секторот на неметални минерали, мебел, метална индустрија и слично“, објаснува Лазаров.

Ваквите податоци се само потврда дека македонскиот извоз е исклучително сензитивен поради неповолната извозна структура и високата извозна концентрација од аспект на пазари и производи, објаснува професорот.

„Оттука, она на што ние како земја треба да работиме во иднина е искористување на развојните потенцијали на домашниот извозен сектор во повеќе сектори каде што домашната додадена вредност е поголема затоа што тоа е единствениот начин како извозот во иднина да стане главен мотор на економскиот раст на земјата“, вели Лазаров.

Сега е на потег Владата. Потребна е поголема поддршка за домашните извозни компании, смета тој. Преку нив треба да се работи на промена на извозната структура и зголемување на извозната диверзификација.

Во моментов нема коментари за веста. Биди прв да коментира...

Остави коментар