Паѓа продажбата на електрични возила во Македонија: А царините за кинеските?

Европската Унија на 12 јуни објави нови привремени давачки за кинеските електрични возила (ЕВ), при што висината на царините ќе се заснова на процените за тоа колкава државна поддршка добива извозникот на ЕВ. Новите тарифи следуваат од повеќемесечната истрага за употребата на финансиските субвенции од страна на Кина и тие ќе бидат наметнати покрај царината од 10 отсто што веќе е во сила во ЕУ.

Последната одлука, која беше соопштена од ЕУ минатата недела, е дека автомобилите на „Тесла“ што се увезени од Кина ќе подлежат на царина во висина од девет проценти. Производителите на „МГ саиц“, „Волво“, „Гели“ и БЈД се соочуваат со дополнителни давачки од 36,3 отсто, 19,3 отсто и 17 отсто, соодветно.

Победници и губитници

Новите тарифи сигурно ќе им наштетат на кинеските производители на електрични автомобили во однос на профитот и на работните места. Но тие секако ќе влијаат и на европскиот пазар.

„Во втората половина од годинава сигурно царините ќе имаат влијание врз производство и цените на електричните автомобили. Од сите електрични возила што се продаваат во Eвропа, околу 17 проценти се произведени во Кина. Кинеските автомобили се поконкурентни и поевтини и, од таа гледна точка, германската автомобилска индустрија остро реагираше на овие царини, бидејќи можноста за одговор од Кина може да ги погоди особено германските производители што прават голем профит во Кина со продажбата на автомобили“, вели Виктор Мизо, генерален директор на „Костал Македонија“.

Виктор Мизо/Приватна архива

Германските производители на автомобили силно се противат на новите тарифи и ја советуваат Европската комисија без одложување да најде решение преку преговори со Кина. Според неодамнешното соопштение на Германското здружение на автомобилската индустрија, германската автомобилска индустрија не очекува кинеските ЕВ да го преплават европскиот пазар. Се очекува тие да сочинуваат од пет до десет отсто од вкупниот пазар на патнички автомобили до 2030 година. Во 2023 година германските производители продале околу 10 пати повеќе електрични автомобили во Кина отколку што кинеските производители продале во Германија.

Што ќе значи ова за купувачите на електрични возила

Трошоците за купување електрични возила увезени од Кина ќе се зголемат за купувачите од ЕУ. Дополнително, другите производители на автомобили може да ја искористат можноста да ги зголемат своите цени за да го зголемат профитот. Македонија секако може да ја избегне оваа „трговска војна“ бидејќи не е членка на Европската Унија, што значи дека засега не е обврзана да ги почитува царинските тарифи наметнати од ЕУ за кинеските автомобили.

„Во Македонија продажбата на електрични автомобили е намалена за речиси 50 проценти, интересот е намален. Продавачите на кинески автомобили на овој пазар нема да почувствуваат разлика во цените, бидејќи нема тарифи. Но доколку овие мерки на долг рок предизвикаат зголемување на цените на електричните автомобили произведени во ЕУ, тоа секако дека ќе се одрази и на нашиот пазар“, вели Дејан Ристовски од „Олимпија моторс“.

Дејан Ристовски/Приватна архива

Но, сепак, доколку државата одлучи да ги прифати европските регулативи, како што беше во случај со санкциите кон Русија, тогаш овие тарифи ќе важат и во земјава.

„Тарифите уште повеќе ќе го намалат и така малиот пазар на електрични возила во земјава. Цените на кинеските електрични автомобили ќе мора да се зголемат во зависност од тоа за кој производител станува збор и под колкав процент на тарифа подлежи. Таков беше случајот со комерцијалните автомобили произведени од руската компанија ’Газ’, санкциите што ги воведе ЕУ ги воведе и Македонија и тоа влијаеше на продажбата„ велат за „Блумберг Адрија“ од „АБЦ бродерс“, увозници на кинески електрични автомобили од марката ДФСК.

Bloomberg

Тарифите на ЕУ го забавија протокот на електрични возила од кинеско производство

Новите тарифи, кои се во сила од 5 јули, веќе влијаат врз кинеските автомобили. Според последното истражување на „Датафорс“ (Dataforce), бројот на нови електрични возила регистрирани во ЕУ од кинески производители на автомобили минатиот месец падна за 45 отсто во однос на јуни.

Податоците на „Датафорс“ за јули ги вклучуваат најголемите пазари во ЕУ, како што се Германија, Франција и Италија. Во Германија кинеските марки учествуваа со осум проценти од регистрациите на возила во јули, што е намалување од 13 проценти во јуни, според „Датафорс“. Во Франција падот беше на пет од осум проценти. Ефектите по еден месец од воведувањето на тарифите се видливо намалување на увозот на кинески електрични возила во Европа, зголемување на нивните цени и потенцијално зголемена несигурност во односите меѓу европските и кинеските производители.

 

 

 

 

 

Во моментов нема коментари за веста. Биди прв да коментира...

Остави коментар