Рекорден удел на Кина во продажбата на е-возила пред воведувањето на санкции од ЕУ

Кинеските брендови зазедоа рекордни 11 отсто од европскиот пазар на електрични автомобили во јуни, пред строгите царини на Европската Унија, кои стапија во сила на почетокот на месецов.

САИЦ (SAIC Motor) ја предводеше пазарната офанзива, доставувајќи им го својот хечбек МГ4 (MG4) на дилерите во големи количества, според „Датафорс“ (Dataforce). Автомобилите регистрирани пред 5 јули може да им се продаваат на купувачите без дополнителни царини за увезени електрични возила.

Кинеските марки регистрираа повеќе од 23.000 електрични возила низ Европа во текот на месецот, што е рекордна бројка. Нивниот скок од 72 отсто во споредба со мај значи двојно поголем раст на вкупните европски регистрации на електрични возила за јуни. На новите царини подлежат и автомобилите произведени во Кина под брендовите на западните производители, вклучувајќи ги „Волво“ (Volvo), БМВ (BMW) и „Тесла“ (Tesla).

Дали зголемувањето на обемот на продажба ќе може да се задржи ќе се види во наредните месеци, кога ќе заживеат новите царини на ЕУ. За САИЦ, дополнителните давачки значат зголемување на трошоците за 38 проценти на ова поле, додека БЈД ќе плати дополнителни 17 проценти на веќе постојните давачки од 10 проценти.

И кинеските и европските производители сакаат да отворат погони во Европа што е можно поскоро за да избегнат нови царини, додека тензиите меѓу Пекинг и Брисел се закануваат да ескалираат во трговска војна.

САИЦ, инаку кинеска државна компанија, постигна најголем скок во уделот на увозот на кинески брендови, но околу 40 отсто од моделите МГ4 регистрирани во јуни дојдоа преку саморегистрација од трговците - „што не е многу здрав раст“, ​​посочува Габриел Јухас од „Датафорс“.

Компанијата нуди дарежливи договори за лизинг, вклучувајќи и промоција два за еден МГ4 во Германија, каде што продажбата на електрични возила е намалена.

Од друга страна, има знаци на напредок во БЈД, најголемиот светски производител на електрични возила. „Маркетиншката кампања насочена кон Европското првенство во фудбал што се одржа во Германија даде плод кај потрошувачите, рече Џулијан Лицингер“, аналитичар во „Датафорс“.

Друг позитивен фактор за европскиот пазар на електрични возила во јуни беше воведувањето стимулации во Италија, што резултира со двојно зголемување на продажбата во однос на претходната година. Околу 200 милиони евра субвенции за нови електрични возила исчезнаа за помалку од девет часа, се наведува во соопштението за печатот на италијанската влада. Приближно 60 отсто отидоа кај граѓаните, а остатокот беше собран од фирми.

Тој раст ја лансира Италија, која инаку заостануваше во продажбата на електрични возила, меѓу првите шест пазари на ЕУ.

Италијанската премиерка Џорџа Мелони работи на дипломатија со кинескиот претседател Шји Џјинпинг. Таа со посета на Кина ќе се обиде да ги ублажи односите меѓу двете земји и да ги привлече тамошните производители.

Генерално, минатиот јуни, во кој беа регистрирани над 208 илјади ЕВ, беше третиот најдобар месец за продажба на електрични возила во историјата на европскиот пазар. Според Европската асоцијација на производители на автомобили, подобри резултати се постигнати само во декември 2022 година и март 2023 година.

Во моментов нема коментари за веста. Биди прв да коментира...

Остави коментар