ЕУ гласаше за царини до 45 отсто за електричните возила од Кина

Европската Унија денеска гласаше да воведе тарифи до 45 отсто на електричните возила од Кина, потег што ќе ги зголеми трговските тензии со Пекинг, според луѓе запознаени со процесот.

Европската комисија, извршниот орган на блокот, сега може да продолжи со имплементација на давачките, кои би траеле пет години, велат упатени извори, кои зборуваа под услов на анонимност. Десет земји членки гласаа за мерката, додека Германија и уште четири други гласаа против, а 12 беа воздржани.

Одлуката на ЕУ доаѓа по истрага што откри дека Кина неправедно ја субвенционирала својата индустрија. Пекинг го негира тоа тврдење и се закани со свои тарифи за европските млечни производи, алкохолот, свинското месо и за автомобилскиот сектор.

Блокот активно се обидува да ја намали својата зависност од Кина, а поранешниот претседател на Европската централна банка, Марио Драги, минатиот месец предупреди дека „државно спонзорираната конкуренција на Кина“ претставува закана за ЕУ, која може да ја остави ранлива. ЕУ, која минатата година направи трговија од 739 милијарди евра (815 милијарди долари) со Кина, беше поделена по прашањето дали да ги наметне давачките.

ЕУ и Кина ќе продолжат со преговори за да најдат алтернатива на тарифите. Двете страни истражуваат дали може да се постигне договор за механизам за контрола на цените и обемот на извозот наместо тарифи.

Европската комисија повеќепати изјави дека секоја алтернатива на тарифите мора да има строги барања, вклучувајќи усогласеност со правилата на Светската трговска организација (СТО), за да се адресира влијанието на кинеските субвенции и да биде нешто што ЕУ може да го следи за усогласеност.

Новите тарифни стапки ќе бидат до 35 отсто за производителите на електрични возила што извезуваат од Кина. Новите давачки би биле над постојната стапка од 10 отсто.

Кинеските производители на електрични возила ќе треба да одлучат дали да ги апсорбираат тарифите или да ги зголемат цените, во време кога забавувањето на побарувачката дома ги притиска нивните профитни маржи. Најавата за давачките поттикна некои кинески производители на автомобили да размислуваат за инвестирање во фабрики во Европа, што може да им помогне да ги избегнат тарифите.

Дополнителните тарифи веќе го забавија замавот на кинеските производители на автомобили во Европа, при што нивните продажби паднаа за 48 отсто во август, на најниско ниво во последните 18 месеци. Регионот е посакувана дестинација за производителите бидејќи електричните возила се продаваат во релативно големи бројки и по многу поцврсти цени отколку на други извозни пазари.

Уделот на електрични автомобили продадени во ЕУ што се произведени во Кина се зголеми од околу 3 на повеќе од 20 отсто во последните три години. Кинеските брендови сочинуваат околу 8 отсто од тој пазарен удел, додека меѓународните компании што извезуваат во Кина, вклучувајќи ја и „Тесла“ (Tesla Inc.), го заземаат остатокот.

Сепак, зголемувањето на тарифите во Европа ќе има „минорно влијание“ врз кинеските производители бидејќи регионот сочинува само мал дел од нивната вкупна продажба, според аналитичарот на „Даива“ (Daiwa Securities), Кевин Лау. Европа придонесе од 1 до 3 отсто во вкупната продажба за БЈД (BYD Co.), „Гили“ (Zhejiang Geely Holding Group Co.) и САИЦ (SAIC Motor Corp.) во првите четири месеци од годинава, процени тој.

Додека Брисел се стреми кон рамноправни услови за европските компании, германските производители на автомобили се загрижени за одмаздата, која може да ги влоши предизвиците со кои веќе се соочуваат на нивниот најважен глобален пазар. „Мерцедес“ (Mercedes-Benz Group AG) и БМВ (BMW AG) го притиснаа Берлин да гласа против повисоките тарифи и ја повикаа ЕУ да преговара со Пекинг.

Германските производители на автомобили, вклучувајќи ги „Фолксваген“ (Volkswagen AG), „Мерцедес“ и БМВ, би биле најтешко погодени во трговски спор, бидејќи Кина сочинуваше околу една третина од нивната продажба на автомобили во 2023 година.