Кина поднесе жалба до СТО поради европските царини за електрични возила

Кина официјално поднесе жалба до Светската трговска организација (СТО) поради одлуката на Европската Унија (ЕУ) да воведе високи царини за кинеските електрични возила.

Кина го претстави случајот пред механизмот за решавање спорови на СТО во петокот, се наведува во соопштението на Министерството за трговија. Ова е направено за да се заштитат развојните права и интереси на индустријата за електрични возила, се додава во извештајот.

„Пресудата во привремениот заклучок на ЕУ нема фактичка и правна основа. Таа сериозно ги прекрши правилата на СТО и ја поткопа глобалната соработка во справувањето со климатските промени“, рече портпаролот на Министерството. „Ја повикуваме ЕУ веднаш да ги исправи своите грешки и заеднички да ја заштитиме економската и трговската соработка меѓу Кина и ЕУ, како и стабилноста на синџирот за снабдување со електрични возила“, додаде портпаролот.

Односите на Пекинг со ЕУ паднаа на најниско ниво во последните месеци, бидејќи блокот ја приближува својата политика кон Кина поблиску до онаа што ја водат САД. Минатиот месец ЕУ воведе привремени царини од дури 37,6 отсто за увоз на некои автомобили од Кина, по повеќемесечната истрага за кинеската државна помош за производителите на електрични возила.

Овој потег наиде на брза осуда од Пекинг. Кина веќе се закани со одмазда против европските земјоделци и производители на авиони и започна антидампинг истрага против француската индустрија за алкохолни пијалаци.

Во моментов нема коментари за веста. Биди прв да коментира...

Остави коментар