БЈД на пат да ја преземе круната од „Тесла“ за најголем производител на е-возила

БЈД (BYD) би можел да ја надмине „Тесла“ (Tesla) во годишната продажба на електрични возила годинава, бидејќи побарувачката во Кина расте додека САД и Европа стагнираат, според „Блумберг интелиџенс“ (Bloomberg Intelligence).

Тоа е промена од јануари, кога од БИ рекоа дека очекуваат „Тесла“ да остане пред БЈД до крајот на деценијата.

Сепак, владеењето на БЈД може да биде краткотрајно бидејќи казнените царини на САД и Европската Унија ги ограничуваат можностите за раст на кинескиот производител на автомобили во Азија и пазарите во развој, се наведува во извештајот објавен во средата.

Застојот на побарувачката за електрични возила значи дека моторите со внатрешно согорување, вклучувајќи ги и хибридите, ќе го зголемат профитот за постарите производители на автомобили како што се „Џенерал моторс“ (GM), „Фолксваген“ (Volskwagen) и „Форд“ (Ford Motor) и би можеле да поттикнат понатамошни откупи на акции или активности за преземање, наведува високиот европски автомобилски аналитичар Мајкл Дин во извештајот на БИ.

„Тесла“ во вторникот објави за својот четврти последователен квартал со разочарувачки профит. Производителот на автомобили е далеку од темпото на 1,8 милион автомобили што ги продаде минатата година и повторно предупреди дека очекува „значително пониска“ стапка на раст во 2024 година. Како уште еден знак дека возбудата околу електричните возила опаѓа, „Порше“ (Porsche) во понеделникот се повлече од својата цел автомобилите на батерии да учествуваат со повеќе од 80 отсто од продажбата на нови возила до 2030 година.

Bloomberg

„Оригиналната цел на 'Тесла' за годишен раст од 50 отсто е урната“, рече Дин. „Долгорочниот успех на 'Тесла' зависи од евтиниот 'модел 2', кој допрва треба да биде претставен“.

БЈД накратко ја престигна „Тесла“ во продажбата на чисто електрични возила во четвртиот квартал од минатата година, надминувајќи го својот американски ривал со 526.409 наспроти 484.507. Тој замав се задржа и годинава, со испорачани речиси милион електрични и хибридни автомобили во вториот квартал, со помош на агресивниот попуст на домашниот пазар.

Сепак, кинеската ценовна војна е „неодржлива“ и може да доведе до понатамошни излегувања и консолидација, посочија од БИ.

Намалената побарувачка за електрични возила го награди скептичниот - и многу критикуван - облог на „Тојота“ (Toyota Motor Corp.) за долговечност на моторите со внатрешно согорување и хибридите, со раст од 50 отсто од средината на 2023 година, се наведува во извештајот.

На подолг рок се прогнозира БЈД да го задржи своето продажно водство пред „Тесла“ до 2027 година, пред американскиот производител на автомобили да ја врати круната во 2028 година, додека третопласираниот „Фолксваген“ полека ќе ја намалува разликата со своите поголеми ривали.

„Тесла“ останува најголемиот производител на автомобили на глобално ниво според пазарната капитализација, вредна 786 милијарди долари на затворањето во вторникот - пред акциите да паднат за 8 отсто во продолженото тргување. БЈД е трет со само 100 милијарди долари.

Во моментов нема коментари за веста. Биди прв да коментира...

Остави коментар