Продажбата на автомобили во Европа се зголеми откако Италија воведе субвенции

Продажбата на автомобили во Европа се зголеми во јуни по порастот на побарувачката за електрични автомобили во Италија откако владата на премиерката Џорџа Мелони ги воведе долгоочекуваните субвенции.

Регистрациите на нови автомобили се искачија за 3,6 проценти до 1,31 милиони единици минатиот месец во споредба со претходната година, објави денеска Европската асоцијација на производители на автомобили. Продажбата на електрични возила во регионот беше рамна откако падот во Германија и Франција го неутрализираше растот во Италија, каде испораките се зголемија повеќе од двојно. Низ Европа, уделот на автомобили на батерии на пазарот благо се намали.

Промената кон електрични возила во Европа забави поради високите цени и укинувањето на субвенциите од страна на голем број влади. Затишјето ги поттикнува компаниите како „Мерцедес“ (Mercedes-Benz Group AG) да ги спуштат целите за продажба на електрични возила додека производителите на батерии ги ревидираат проектите. „Стелантис“ (Stellantis NV) го запре производството на електрични возила во својата фабрика во Мирафиори во близина на Торино, а „Фолксваген АГ“ овој месец започна постапка што може да доведе до затворање на фабриката во Белгија за производство на електричниот „ауди Кју8 е-трон“ (Audi Q8 e-tron).

„Загубите на електричните возила со батерии остануваат превисоки, а инвестициите треба да се намалат и се намалуваат“, напиша аналитичарот на „Сити“ (Citi) Харалд Хендрикс во белешка овој месец.

Во јуни, уделот на регистрации на целосно електрични возила падна на 15,9 проценти, помалку од 16,5 проценти пред една година, продолжувајќи го трендот на разочарувачки продажби на електрични возила годинава. Нивниот удел се намали на 13,9 проценти до јуни, во споредба со 14,2 проценти една година порано, што претставува пресврт на очекувањата за забрзување на промената.

Високите трошоци за позајмување и пригушениот раст ширум Европа влијаат на расположението на потрошувачите на пазарот. Продажбата на автомобили во Европската унија во првата половина од годинава е за околу 18 проценти под нивото пред пандемијата во 2019 година. Изгледите за Германија, најголемата европска економија, се затемнуваат поради падот на извозот и политичката несигурност во Франција, според претседателот на ЗЕВ (ZEW), Ахим Вамбах.

Побарувачката за електрични возила останува многу подложна на стимулации за купување. Во Германија, најголемиот европски пазар на автомобили, владата одеднаш ги прекина субвенциите во декември, што доведе до пад од 16 проценти на регистрациите во првата половина од годината. Во Шведска, која исто така ги повлече субвенциите, продажбата падна за една петтина.

Побарувачката за возилата на „Тесла“ (Tesla Inc.) продолжи да опаѓа низ целиот регион, со пад од 7,2 проценти во јуни. Продажбата падна за 12 проценти во текот на првото полугодие.

Во моментов нема коментари за веста. Биди прв да коментира...

Остави коментар