Продажбата на автомобили во Европа расте трет месец по ред

Продажбата на автомобили во Европа се зголеми трет месец по ред во април, бидејќи потрошувачите продолжија да купуваат повеќе електрични и хибридни модели. Регистрациите на нови возила се зголемија за 7 проценти на 1,15 милиони минатиот месец, соопшти во среда Европската асоцијација на производители на автомобили. Продажбата се прошири на главните пазари, вклучувајќи ги Германија и Велика Британија, а испораките на електрични возила скокнаа за 38 проценти.

Силната побарувачка е добар знак за европските производители на автомобили кои се борат со прекумерен капацитет, американските царини и намалувањето на продажбата во Кина. Продажбата на електрични возила расте бидејќи се достапни попристапни модели и од домашни производители, вклучувајќи ги „Фолксваген“ (Volkswagen AG) и „Стелантис“ (Stellantis NV), како и од кинески брендови предводени од БЈД (BYD Co). Во Германија, најголемиот европски пазар каде што е во сила нова субвенција, продажбата на електрични возила скокна за 41 проценти.

Сè уште не е јасно до кој степен конфликтот на Блискиот Исток - кој предизвика поголем интерес за електрични возила во регионите, вклучувајќи ја и Азија - влијае на одлуките за купување во Европа. Во исто време, војната претставува ризик доколку продолжи многу подолго, според „Блумберг Интелиџенс“ (Bloomberg Intelligence).

„Повисоките трошоци за енергија предизвикани од војната во Иран може да ја намалат довербата на потрошувачите и да го загрозат трошењето на скапи производи како автомобили“, изјави Џилијан Дејвис од БИ во белешка во вторникот.

 

Иако достапните електрични возила добро се снаоѓаат, има сè повеќе докази дека поскапите автомобили на батерии сè уште се тешки за продажба. Акциите на „Ферари“ паднаа во вторникот откако првиот електричен супер автомобил на компанијата, „луче“ (Luce) од 550.000 евра (639.000 американски долари), не успеа да ги импресионира критичарите и инвеститорите.

Испораките на хибридни автомобили, исто така, се зголемија во регионот минатиот месец, додека продажбата на бензински и дизел возила се намали, што укажува на континуирано структурно поместување на пазарот кон автомобили со батерија.

„Тесла“ продолжи со закрепнувањето во Европа по болната 2025 година, при што продажбата на американскиот производител во Европа скокна за 47 проценти во април. „Фолксваген“, „Стелантис“, „Мерцедес-Бенц“ и БМВ, исто така, објавија повисоки испораки.

Кинеските брендови продолжуваат да се пробиваат во Европа, обезбедувајќи олеснување од бруталната ценовна војна дома, при што „Џили“ (Geely) и БЈД се меѓу најпродаваните во земјата. „Чери“ (Chery Automobile Co) беше меѓу брзорастечките со пораст од 322 проценти. Нејзините спортски возила „џаеко“ (Jaecoo) се покажуваат како особено популарни кај британските купувачи.