„Маерск“ го турка увозот надвор од САД и очекува добивка од 9,5 милијарди долари

„А.П. Мулер–Маерск“ (A. P. Moller-Maersk A/S), компанија што ја движи глобалната трговија, ја зголеми својата финансиска прогноза за 2025 година, наведувајќи дека побарувачката надвор од Северна Америка е „стабилна“, и покрај загриженоста од можна трговска војна.

Глобалниот пазар на контејнерски превоз, според компанијата со седиште во Копенхаген, ќе порасне меѓу 2 и 4 отсто годинава. Претходната прогноза предвидуваше распон од намалување за 1 отсто до раст од 4 отсто.

„И покрај пазарната нестабилност и историски високата неизвесност во глобалната трговија, побарувачката остана стабилна, а ние продолживме да реагираме брзо и флексибилно“, изјави извршниот директор Винсент Клерк. 

Основната добивка на „Маерск“ пред камати, даноци и амортизација (ЕБИТДА) во 2025 година се очекува да биде во рамките од 8 до 9,5 милијарди долари, што е зголемување во однос на претходната прогноза од 6 до 9 милијарди долари. Тоа е во споредба со просечната процена на аналитичарите, која изнесуваше 7,94 милијарди долари.

„Маерск“, кој контролира околу 14 отсто од светската флота на контејнерски бродови, се очекува да претрпи последици од протекционистичките политики на САД, кои вршат притисок врз глобалната слободна трговија. Сепак, данската групација на краток рок имаше и корист, бидејќи обемот на превоз порасна на одредени пазари годинава, откако компаниите се снабдуваат со увезена стока пред евентуалното воведување царини.

Во извештајот „Маерск“ наведе дека „намалувањето на увозот во Северна Америка беше повеќе од надоместено со силен раст на увозот во Европа, Латинска Америка, западниот дел на Централна Азија и Африка“.

Во меѓувреме, глобалниот економски раст ќе биде „умерен“ во втората половина од годината, поради негативното влијание на царините од САД, соопшти „Маерск“.

„Непредвидливата природа на царините го усложни пазарот на контејнерски транспорт“, оцени минатата недела транспортниот аналитичар Анчал Аич од „Блумберг интелиџенс“ (Bloomberg Intelligence). „Оваа нестабилност во трговската заднина доаѓа во време кога се очекуваше растот на понудата да ја надмине побарувачката“.

Кризата во Црвено Море главно ги зголеми профитите на контејнерските компании, бидејќи сопствениците на бродови се пренасочуваат по подолгата маршрута јужно од Африка, што делумно ја ублажува преголемата понуда на пловни објекти во индустријата.

„Маерск“ денеска ја повтори својата процена дека кризата ќе трае до крајот на годината.

Во моментов нема коментари за веста. Биди прв да коментира...

Остави коментар