Неочекуван пад на германското производство, нова грижа за македонските фабрики

Германија бележи пад на индустриското производство во октомври, што значи дека последниот квартал од годинава го почна со неочекувани резултати. Тоа ги урна надежите дека секторот што е клучен за најголемата европска економија можеби полека ги надминува проблемите.

Производството се намали за еден отсто споредено со претходниот месец, што е полошо од која било прогноза во истражувањето на „Блумберг“, според кое се предвидуваше раст од еден отсто.

„Падот главно се должи на производството на енергија, а негативно влијание имаше и автомобилската индустрија“, соопшти утрово германскиот завод за статистика.

Индустриското производство во Германија на месечно ниво Bloomberg Mercury

Експертите во Германија коментираат дека сè уште не се гледа крајот на индустрискиот пад во Германија и дека ова е многу слаб почеток на четвртиот квартал, зголемувајќи го ризикот од зимска рецесија во најголемата европска економија.

Производствената рецесија многу тежи врз германската економија, која се соочува со контракции веќе втора година по ред. Претседателот на германската централна банка „Бундесбанк“ (Bundesbank), Јоаким Нагел, дури предупреди дека бруто-домашниот производ (БДП) може да се намали во 2025 година доколку новоизбраниот американски претседател Доналд Трамп ги воведе трговските тарифи што ги најавува за Кина и некои други земји.

Што велат економистите на „Блумберг“?

„Изненадувачки слабите бројки на производството во октомври ја нагласуваат тековната борба на германската индустрија проследена со стравот од високи американски царини, кој сега се додава на постојните проблеми, кои вклучуваат слаба побарувачка од Кина и високи трошоци за енергија“, вели економистот на „Блумберг“ Мартин Адемер.

Индустријата е под голем притисок од надворешни фактори, како што се губењето на руските енергетски резерви по инвазијата на Украина и слабата кинеска побарувачка. Дома, пак, недостигот од квалификувани работници е уште еден горлив проблем.

„Блумберг“ веќе пишуваше за тоа дека Германија во наредниот период ќе има потреба од 288.000 работници на годишно ниво, и тоа во најдоброто сценарио, во кое жените и постарите луѓе што се веќе таму би требало да почнат да работат подолго. Ако тие претпоставки не се остварат, можеби ќе бидат потребни дури 368.000 доселеници годишно за да се спречат значително намалување на работната сила и осакатување на германскиот економски раст.

Bloomberg Mercury

Поради лошите економски перспективи некои компании најавија укинување на илјадници работни места, особено во водечкиот автомобилски сектор, што предизвикува загриженост за надолна спирала.

Извесна поддршка може да дојде од Европската централна банка (ЕЦБ), која најверојатно повторно ќе ги намали трошоците за задолжување на состанокот закажан за следната недела, а трендот се очекува да продолжи и во 2025 година.

Кризата во величествената Германија веќе се отсликува и во Македонија

„Блумберг Адрија“ веќе пишуваше за тоа дека најавите од автомобилските гиганти како „Фолксваген“ и „Форд“ дека ќе затвораат фабрики и ќе отпуштат илјадници луѓе се одразува и кај нас со тоа што се намалуваат и нарачките за македонските фабрики за автоделови и компоненти. А, во тој сектор во земјава работат над 30.000 луѓе и на него отпаѓа над половина од вкупниот извоз, кој главно е наменет токму за Германија.

 

 

Бизнисмените посочуваат дека падот на нарачките кај некои фабрики во земјава достигнува дури 30 проценти, а искуството покажува дека ефектот на тоа што се случува во Европа доаѓа со мало задоцнување кај локалните доставувачи на големите автомобилски производители, па, оттука, треба да бидеме подготвени и за сценарио во кое ударот врз македонската економија би бил можеби и уште поголем доколку продолжат проблемите во најголемата европска економска сила.

Неодамна во рамките на првата годишна конференција на „Блумберг Адрија“ во Скопје, премиерот Христијан Мицкоски рече дека тоа што се случува во Германија во моментов нема веднаш да се почувствува во земјава, но веќе во вториот квартал следната година може да доведе до негативни ефекти, и тоа не само кај нас туку на глобално ниво. Од тој аспект, рече тој, јасно е дека на земјава ѝ е потребна диверзификација на извозот, но тоа не може да се случи во краток рок. Системот е граден со децении и не може одеднаш да се смени извозната структура или да се најдат нови соработници и нови алтернативни пазари, потенцира премиерот.

 

Во моментов нема коментари за веста. Биди прв да коментира...

Остави коментар