„Фолксваген“ под ризик од масовни штрајкови, преговорите во ќор-сокак

„Фолксваген“ (Volkswagen AG) се соочува со растечка закана од масовни штрајкови додека извршните директори и синдикалците се расправаат околу тоа како да се реструктурира најголемиот производител на автомобили во Европа.

Лидерите на синдикатите нудат дополнителни кратења на трошоците од 1,5 милијарда евра - вклучувајќи и откажување од некои бонуси - за да ги задржат фабриките отворени, откако менаџментот ја спомена идејата за затворање. Но двете страни остануваат далеку една од друга, бидејќи раководството бара многу поголеми кратења, за кои инсистира дека се потребни за да се намали вишокот капацитет. Разговорите ќе продолжат денеска, со предупредувачки штрајкови, кои се очекува да започнат во декември, во ситуација кога нема приближување на ставовите.

„Фолксваген“ се залага за длабоки заштеди кај својот главен бренд, кој се бори со слаба продажба на електрични возила и намалена релевантност во Кина, најголемиот автомобилски пазар во светот. Главниот извршен директор Оливер Блуме се обидува да ги намали трошоците во Германија, каде што трошоците за труд и енергија се меѓу највисоките во Европа.

Претставниците на работниците во средата изјавија дека менаџментот цели кон вкупни кратења од 17 милијарди евра, од кои работната сила е мал дел. Компанијата размислува за мерки многу порадикални од оние што синдикатите се подготвени да ги прифатат, вклучувајќи затворање или продажба на неколку фабрики во Германија - кршејќи табу во земјата позната по својот поконсензуален пристап кон работните односи.

Менаџментот предложил продажба на фабриките за автомобили во Оснабрик и во Дрезден, според луѓе запознаени со ситуацијата. „Фолксваген“ исто така размислува да ја користи својата локација во Емден за договорно производство, наведоа изворите, кои побараа да не бидат именувани бидејќи преговорите се приватни.

Портпаролот на „Фолксваген“ одби да коментира.

Додека синдикалците се цврсто против затворање на фабриките, извршните директори на  „Фолксваген“ изјавија дека падот на продажбата во Европа го оставил производителот со околу две фабрики како вишок.

Фабрики на „Фолксваген“ што се под ризик

Три фабрики во Германија се најчувствителни Bloomberg

Ако компанијата не е подготвена да направи компромис, тогаш треба да се подготви за „индустриски спор околу локациите каков што земјата не видела со децении“, изјави во средата Торстен Грогер, главен преговарач од страна на работниците, на прес-конференција во Волфсбург.

Во Германија, синдикатите често организираат предупредувачки штрајкови - кои се привремени прекини на работата - за да извршат притисок врз менаџментот кога преговорите за плати се во застој. Работничките лидери се стремат кон јасност „што е можно побрзо“ за да можат да ги информираат работниците пред Божиќ како може да изгледа можното реструктурирање, изјави Даниела Кавало, главен трудов претставник на „Фолксваген“, во четвртокот во Волфсбург.

„Фолксваген“ не е сам во барањето кратења. „Форд“ (Ford Motor Co.) во средата објави планови за елиминирање на уште 4.000 позиции во Европа - околу 14 отсто од својата работна сила на континентот - поради слабата побарувачка за електрични возила. Повеќето од кратењата ќе ја погодат германската присутност на производителот, во уште еден удар за индустриското производство во најголемата економија во Европа. Продажбата на автомобили во регионот стагнираше во октомври, со падови во Франција, Италија и во Велика Британија, кои во голема мера го поништија подобрувањето во Германија.

Како одговор на притисокот за заштеди на „Фолксваген“, синдикалците во средата понудија намалување на исплатите на дивиденди, намалување на делови од менаџментот, како и на бонусите на работниците следната година и во 2026 година, и ставање на планираните зголемувања на платите во фонд за плаќање на можни отпуштања и намалувања на смените. Производителот на автомобили изјави дека ги разгледува тие предлози, додавајќи дека засега не може да го исклучи затворањето на фабриките.

Менаџментот претходно предложи подрастични мерки, вклучувајќи намалување на илјадници работни места и намалување на платите за 10 отсто за да го поправи главниот бренд „Фолксваген“, кој има неколку неуспешни лансирања на електрични возила и се бори со ниски приноси.

Продажбата на Оснабрик и во Дрезден и пренамената на Емден се само неколку од сценаријата за намалување на трошоците предложени од менаџментот за време на дискусиите, рекоа упатените.

Работниците веќе го чувствуваат влијанието на намалената продажба. Фабриката за електрични возила на „Фолксваген“ во северниот пристаништен град Емден очекува пад на производството следната година поради слабата побарувачка за автомобили на батерии. Оснабрик - кој во минатото преземаше вишок работа од други локации и произведуваше специјални модели - нема договори за производство по 2026 година. Малата фабрика на „Фолксваген“ во Дрезден не нуди капацитет потребен за економично производство.

Корпоративната структура на „Фолксваген“, која им дава на работниците силен глас во клучните одлуки, го направи спроведувањето на кратењата на трошоците предизвик. Претставниците на вработените заземаат половина од местата во надзорниот одбор на компанијата, додека родната држава на „Фолксваген“, Долна Саксонија - каде што се наоѓаат Оснабрик и Емден - има дополнителни две места.

Компанијата минатиот месец го пријави својот најмалку профитабилен квартал во последниве години, зајакнувајќи го аргументот на менаџментот за спроведување драстични мерки. Фокусот на Блуме за поправка на „Фолксваген“ доби итност бидејќи премиум брендовите на групата „Порше“ и „Ауди“ се соочуваат со зголемени проблеми, со застои во синџирот на снабдување, доцнења на модели и намалена побарувачка за луксузни автомобили во Кина, кои ги намалуваат нивните профити.

Во моментов нема коментари за веста. Биди прв да коментира...

Остави коментар