Штрајкот во „Боинг“ заврши, платите ќе се зголемат за 38 отсто

Работниците во „Боинг“ (Boeing) со гласање го прифатија новиот колективен договор и го завршија штрајкот кој во последните 53 дена го попречуваше производството на авиони, со што се создадоа услови за закрепнување на бизнисот и финансиската состојба на американскиот производител на авиони.

Околу 59 отсто од членовите на синдикатот гласаа за најновиот предлог договор, кој предвидува и зголемување на платите за 38 отсто во текот на следните четири години, како и дополнителни придонеси за пензија, пренесува подружницата на Меѓународното здружение на машински и аеронаутички работници (IAM) која претставува 33 илјади штрајкувачи.

„Ова беше клучен момент вечерва“, изјави Џон Холден, претседател на подружницата IAM 751. „Ова е победа. Не се откажавме и победивме“, додаде тој. Објасни дека гласале повеќе од 26 илјади работници и изрази желба „да ги врати членовите назад во фабриките“.

Работниците ќе се вратат во погоните во сојузните држави Вашингтон, Орегон и Калифорнија веќе од среда.

Договорот претставува победа и за Кели Ортберг, новиот главен извршен директор на „Боинг“, и му отвора пат кон имплементација на планови за реформа на корпоративната култура и подобрување на квалитетот на производството во фабриките. Ортберг ја презеде позицијата пред само три месеци и ја наследи компанијата која се соочува со последици од речиси фаталната несреќа во јануари, по која се натрупаа проблеми во производството, финансиите и високиот менаџмент.

Двајцата лидери беа помирливи по неколку недели напнати преговори, закани, судири и помирување, за што најмногу придонесе министерката за труд, Џули Су.

Клучен договор

Ортберг во пораката до работниците на „Боинг“ го пофали договорот.

„Иако последните месеци беа тешки за сите нас, ние сме дел од истиот тим“, стои во пораката на главниот директор. „Можеме да одиме напред само ако се слушаме и работиме заедно“, додаде тој.

Американскиот претседател Џо Бајден им честиташе на двете страни за договорот и нагласи дека добрите договори се „клучни за раст на американската економија“.

Холден исто така вети дека ќе продолжи да соработува со Ортберг.

Кели Ортберг Bloomberg

„Тој е нов и има многу да научи“, но синдикатот е „подготвен“ да им помогне на членовите да се вратат на работа, рече тој.

Иако синдикалните преговарачи го препорачаа договорот, предупредувајќи дека ново отфрлање може да го загрози напредокот постигнат за време на неколку недели колективни преговори, тие сепак се соочија со силна опозиција – вклучувајќи гласни негодувања откако беа објавени резултатите од гласањето.

Холден призна дека 41 отсто од членовите на синдикатот кои го одбија договорот претставуваат значаен дел од членството и вети дека ќе се залага за уште подобри услови во следните преговори во 2028 година.

На прашањето дали, сега кога штрајкот заврши, членовите треба да се грижат за евентуални откази, Холден изјави дека таков потег на „Боинг“ би бил многу кратковиден.

За да ги намали негативните последици од штрајкот, Ортберг воведе низа мерки за кратење на трошоците, вклучувајќи намалување на работната сила за 10 отсто, привремено запирање на новите вработувања и намалување на патните трошоци за да се заштеди. Компанијата ја презеде во август по промени во високиот менаџмент предизвикани од низа кризи кои му ги скратија „крилата“ на „Боинг“ од почетокот на годината.

Враќање на работа

По два месеца протести и штрајкови, дел од членовите на синдикатот изразија задоволство што првиот штрајк во последните 16 години конечно заврши. Не примиле плати веќе два месеца и морале сами да си плаќаат здравствено осигурување. Сега веднаш им следува зголемување од 13 отсто и дополнителен бонус од 12 илјади долари за да се надоместат тие загуби.

„Среќен сум“, рече Џереми Кронк, член на подружницата IAM 751 неколку моменти по објавувањето на резултатите од гласањето. „Време е да се вратиме на работа“.