Во период на штрајкови, „Боинг“ ќе отпушти 17.000 работници

„Боинг“ (Boeing Co.) планира да ја намали својата работна сила низ светот за околу 10 проценти и најави трошоци во висина од пет милијарди долари за своите комерцијални авиони и одбранбени бизниси, нагласувајќи ја длабочината на финансиските проблеми на производителот на авиони. Ваквите најави доаѓаат во период кога работниците штрајкуваат.

Bloomberg Mercury

 

Се предвидуваат кратења на околу 17.000 работни позиции и ќе опфатат директори, менаџери и вработени, изјави вчера пред вработените главниот извршен директор Кели Ортберг. Компанијата планира и да го одложи воведувањето на својот прв авион 777X, а очекува продажбата во третиот квартал да биде далеку под процените на Волстрит.

„Нашиот бизнис е во тешка позиција и тешко е да се проценат предизвиците со кои се соочуваме заедно. Враќањето на нашата компанија бара тешки одлуки и ќе мора да направиме структурни промени за да се осигуриме дека можеме да останеме конкурентни и да испорачуваме услуги за нашите клиенти на долг рок“, рече Ортберг.

„Ако се земе предвид просечна годишна плата од 100.000 долари, укинувањето на работните места може да обезбеди за компанијата заштеда од околу 1,7 милијарда долари“, рече аналитичарката на „Џеферис“ (Jefferies), Шеила Кахјаоглу. Според неа, ваквиот потег на „Боинг“ може да го скрши мразот и чекорите да ги следат и другите производители на воздухопловството.

„Намалувањата на работната сила се она што го видовме кај помалите доставувачи на почетокот на неделава, што сигнализира дека почесто ќе го гледаме тоа во индустријата“, рече таа.

„Боинг“ ги претстави најновите мерки за намалување на трошоците и прелиминарните финансиски резултати, бидејќи се обидува да излезе од ќор-сокакот во кој се најде со Меѓународната асоцијација на машинисти и работници во воздухопловството. Разговорите пропаднаа претходно неделава без јасен пат за тоа кога и како би можеле да продолжат.

„Боинг“ даде две понуди за повисоки плати, но и двете беа одбиени од синдикатот што ги претставува работниците во фабриките низ западниот брег. Околу 33.000 вработени штрајкуваат веќе еден месец, кочејќи го производството и исцрпувајќи ги резервите на „Боинг“.

Како одговор на најавата на „Боинг“, Меѓународната асоцијација на машинисти и работници во воздухопловството вети дека ќе продолжи со својата индустриска акција.

„Патот за решавање на овој штрајк започнува на преговарачката маса. Неподготвеноста да се остане на маса само го продолжува штрајкот“, се наведува во соопштението.

Акциите на производителот на авиони вчера паднаа за 1,6 проценти, а од почетокот на годинава акциите паднаа за приближно 42 отсто.

Прелиминарни резултати

Компанијата очекува приход во третиот квартал од 17,8 милијарди долари, што е помалку од 18,6 милијарди долари, колку што очекува Волстрит според просекот на процените на аналитичарите од „Блумберг“. Компанијата исто така гледа нето-загуба од 9,97 долари по акција според општоприфатените сметководствени принципи. Компанијата треба да ги објави целосните резултати на 23 октомври.

„Боинг“ очекува резултатите да вклучат околу пет милијарди американски долари комбинирани давачки пред оданочување во неговите два главни деловни оддела. Од тоа, околу 2,6 милијарди долари произлегуваат од уште едно одложување на испораката на широкотрупниот авион 777X. Ортберг рече дека компанијата ги известила клиентите дека првите испораки на авионот нема да започнат до 2026 година, а како причина ги наведе тековниот прекин на работата и паузата за тестирање на летот.
Тоа е најнов неуспех за авионот, чие појавување на небото заостанува веќе пет години.

Првичните испораки, пак, на товарните авиони 777X исто ќе се одложат до 2028 година, соопшти „Боинг“. Севкупно, бизнисот со комерцијални авиони ќе забележи трошоци од три милијарди долари бидејќи во 2027 година ќе го затвори производството на програмата 767 откако ќе бидат изградени преостанатите нарачани авиони.

„Боинг“ веќе иницираше низа планови за намалување на трошоците бидејќи се бори со намалените резерви и ниското производство. Компанијата веќе пушти некои работници на принуден одмор, ги замрзна вработувањата и ги намали корпоративните патувања.