Работниците во фабриките на „Боинг“ ќе штрајкуваат првпат по 16 години

Работниците во фабриките на „Боинг“ (Boeing Co.) се подготвени да престанат со работа, што ќе го парализира производството во центарот за комерцијални авиони на компанијата во Сиетл, откако членовите на најголемиот синдикат го одбија понудениот договор и гласаа за штрајк.

Штрајкот, кој ќе започне на полноќ по локално време во Сиетл, е прв од 2008 година од страна на одделот на Меѓународната асоцијација на машински и воздухопловни работници, кој претставува 33.000 вработени во „Боинг“ на западниот брег на САД.

Ова го зголемува притисокот врз компанијата, која веќе се справува со последиците од неквалитетна изработка, по речиси катастрофалниот инцидент на почетокот од 2024 година, кој предизвика истраги, бунт кај клиентите и промена на раководството.

„Ова беше очекувано одамна, нашите членови гласно и јасно кажаа што мислат вечерва“, изјави Џон Холден, претседател на синдикатот, пред преполната сала со синдикални членови и медиуми. „Очигледно има делови од овој договор што не се доволно добри“. Штом тој заврши со говорот, се слушнаа гласни извици „штрајк, штрајк“.

Членовите со големо мнозинство гласаа за штрајк, при што 94,6 отсто го одбија понудениот договор, а 96 отсто го поддржаа штрајкот, игнорирајќи го повикот за смиреност од новиот извршен директор на „Боинг“, Кели Ортберг, кој се обврза да ги преуреди односите со работната сила. Тие не ја прифатија ни препораката на сопствените синдикални лидери да ги прифатат условите што вклучуваа загарантирано зголемување на платите од 25 отсто во следните четири години. Иако тоа е најголемото зголемување на платите што го понудила компанијата, работниците очекуваа значително поголем раст. Исто така тие беа револтирани што условите го укинуваат годишниот бонус.

„Боинг“ е во финансиски тешка ситуација од несреќата на 5 јануари, која откри недостатоци во неговите фабрики и го принуди да го намали производството. Компанијата губи пари како резултат на тоа, а нејзиниот кредитен рејтинг е на чекор до шпекулативната класа, што ја става во тешка позиција со долг од 45 милијарди долари.

Bloomberg

Револтот на работниците значи дека „Боинг“ и синдикатот ќе мора повторно да седнат на преговарачка маса за да најдат услови што ќе ги задоволат членовите на синдикатот, кој има долга историја на активизам. Каи вон Румор, аналитичар на „ТД Ковен“ (TD Cowen), проценува дека штрајкот може да трае повеќе од 50 дена, што би одзело меѓу 3 и 3,5 милијарди долари од готовинскиот тек на „Боинг“.

Бидејќи синдикатот бара штрајк поради неправедни работни практики, ќе биде назначен медијатор од Националниот одбор за работни односи, изјави Холден. Засега не се закажани преговори. Како синдикален лидер, Холден прво сака да се консултира со работниците за да ги утврди нивните главни приоритети.

„Боинг“ изјави дека понудата била најдобрата што можеле да ја дадат, со оглед на финансиската состојба. Компанијата не кажа како ќе одговори, но менаџерите неделава ги проверуваа вештините на други работници за да видат дали можат привремено да ги заменат штрајкувачите.

Пред ноќното гласање, членовите на синдикатот надвор од фабриката на „Боинг“ во Рентон, каде што се произведуваат авионите „737 макс“, го искажуваа својот гнев за понудата и го опишуваа разочарувањето од стагнацијата на платите под долгорочниот договор склучен во 2014 година, кој исто така ги укина пензиите.

Тие се лути и поради тоа што компанијата задржала одредба што ги принудува работниците да работат шест години пред да ги достигнат највисоките категории на плати.

„Работам неверојатен број часови прекувремено само за да преживеам“, рече Закари Хејли, инспектор за осигурување на квалитетот на „737“, кој работи во „Боинг“ веќе пет години.

Во моментов нема коментари за веста. Биди прв да коментира...

Остави коментар