„Фолксваген“ ризикува штрајк на 500.000 луѓе поради затворањето на фабриките

Компанијата „Фолксваген“ (Volkswagen AG) би можелa да се соочи со штрајкови уште во октомври доколку одлучи да го укине деценискиот договор за безбедност на работните места и да затвори две фабрики, соопшти најголемиот синдикат во земјата.

„Сигурното вработување е дел од основниот договор што беше направен со компанијата, особено за кризи како оваа“, рече на прес-конференција во четвртокот Торстен Грогер, главен преговарач на „ИГ метал“ (IG Metall), кој е задолжен за „Фолксваген“.

„Повеќе од 500.000 работници би можеле да учествуваат во штрајкови на крајот на следниот месец доколку ’Фолксваген’ не започне конструктивни преговори“, додаде Грогер.

Додека синдикатот се држи до барањата платите во автомобилската индустрија да се зголемат за седум отсто, шефицата на „ИГ метал“, Кристијане Бенер, говорејќи на истиот настан, рече дека преминување на четиридневна работна недела би било опција на која работниците би можеле да се согласат.

Најголемиот европски производител на автомобили го бранеше својот план за затворање фабрики во Германија еден ден претходно, велејќи дека слабата продажба на автомобили направила две фабрики да бидат вишок. Повеќе од 20.000 работници присуствуваа на собирот во Волфсбург во средата, при што многумина го исвиркаа извршниот директор Оливер Блум, кој ги објави плановите.

Европа побавно транзитира кон електрични возила, а многу земји, вклучувајќи ги и Германија и Шведска, или ги укинаа или ги намалија субвенциите. Со оглед на тоа што продажбата на автомобили сè уште е за петтина помала од продажбата пред пандемијата, производителите на автомобили, вклучувајќи ги „Фолксваген“, „Стелантис“ (Stellantis NV) и „Рено“ (Renault SA), не работат доволно ефикасно во фабриките, покажуваат податоците од „Џаст ауто“ (Just Auto).

„Фолксваген“ минатата година направи околу девет милиони возила, во споредба со вкупниот капацитет од 14 милиони. Зголемувањето на приносот на главната марка „Фолксваген“ стана потешко, со повисоки трошоци за логистика, енергија и работна сила. Маржата падна на 2,3 отсто во текот на првото полугодие, во споредба со 3,8 отсто пред една година.