Директорот на „Боинг“ заминува, компанијата е пред голема реконструкција

„Боинг“ (Boeing) најави големи промени во своето раководство, вклучувајќи го и заминувањето на главниот извршен директор, откако безбедносната криза во компанијата се зголеми во последните месеци.

Извршниот директор Дејв Калхун ќе ја напушти функцијата на крајот на 2024 година, додека претседателот Лери Келнер нема да бара реизбор, се наведува во соопштението на „Боинг“ објавено во понеделникот. Стен Дил, кој го предводи одделот за комерцијални авиони на „Боинг“, заминува во пензија, а неговата улога ќе ја преземе актуелната главна оперативна директорка Стефани Поуп, соопшти компанијата.

Преструктурирањето на компанијата доаѓа откако клиентите изразија зголемена фрустрација од раководството на Калхун и Дил, бидејќи кризата фокусирана на квалитетот на производството и безбедноста на авионите не покажува знаци на закрепнување. Заминувањето на Келнер, Калхун и Дил претставува завршен чин по речиси катастрофалниот инцидент во јануари.

„Иако отпуштањата ретко се причина за славење, мислиме дека ова е веројатно мудар потег на управниот одбор на ’Боинг’“, рече во понеделникот Роберт Сталард, аналитичар во „Вертикал рисрч“ (Vertical Research Partners). „Многу од клиентите, доставувачите и другите засегнати страни на ’Боинг’ веројатно ја изгубија довербата во компанијата, додека нејзините односи со FAA и NTSB се очигледно затегнати“.

Сеопфатната ревизија на „Боинг“ и неговите доставувачи од страна на американската Федерална управа за авијација (FAA) предизвика загриженост за безбедносната култура на компанијата, изјави главниот функционер на агенцијата минатата недела.

Акциите на „Боинг“ поскапеа за 1,3 отсто во понеделникот во 9.38 часот во Њујорк. Тие годинава паднаа за 28 отсто до 22 март, што е најлошото остварување во индексот Dow Jones Industrial Average.

Подемот и падот на Калхун

Калхун, долгогодишен извршен директор на „Боинг“ и ветеран на „Џенерал електрик“ (General Electric) и „Блекстоун груп“ (Blackstone Group), застана на лидерската позиција на авиокомпанијата во почетокот на 2020 година, додека производителот на авиони се бореше со глобалното заземјување на „737 макс“ (737 Max) по двете големи несреќи во 2018 и 2019 година. Калхун го завршува четиригодишниот ангажман како извршен директор справувајќи се со последиците од друга речиси катастрофална случка со истиот модел.

Bloomberg

Под управата на Калхун, „Боинг“ го врати „737 макс“ во комерцијална употреба во 2020 година, но производителот на авиони се бореше да го подигне нивото на производство за време на пандемијата поради недостиг од работна сила.

Сега „Боинг“ се соочува со промени во неговото повисоко раководство и управен одбор бидејќи работи на повторно воспоставување контрола на квалитетот и враќање на довербата на потрошувачите и регулаторите. Поранешниот извршен директор на „Куалком“ (Qualcomm), Стив Моленкопф, кој беше избран да го замени Калхун како претседател на одборот, ќе ја води потрагата по неговиот наследник.

„Промената на високиот менаџмент е добар прв чекор во решавањето на многубројните проблеми на компанијата, но главното парче од сложувалката што недостига е кој ќе биде следниот извршен директор“, рече Сталард. „Ќе треба некој со педигре и трпение, бидејќи поправањето на ситуацијата во ’Боинг’ веројатно ќе биде повеќегодишно нелинеарно патување“.