„Амазон“ склучи договор од 38 милијарди долари со „Опен еј-ај“ за чипови на „Енвидија“

„Амазон“ (Amazon.com Inc.) преку својата единица во облак потпиша договор вреден 38 милијарди долари за да обезбеди дел од ненаситната побарувачка на „Опен еј-ај“ (OpenAI) за компјутерска моќ. Акциите на „Амазон“ пораснаа.

Создавачот на ЧетГПТ (ChatGPT) ќе му плаќа на АВС (Amazon Web Services – AWS) за пристап до стотици илјади графички процесорски единици на „Енвидија“ (Nvidia Corp.) како дел од седумгодишен договор, соопштија компаниите во понеделникот.

Оваа соработка е најнов показател за трансформацијата на „Опен еј-ај“ од истражувачка лабораторија во моќен центар за вештачка интелигенција, кој ја преобликува технолошката индустрија. Компанијата се обврза да потроши 1,4 билион долари за инфраструктура потребна за изградба и напојување на нејзините модели на ВИ – невидено трошење што предизвика загриженост за можен инвестициски балон.

За „Амазон“, кој се мачи да се наметне во ерата на ВИ, договорот претставува потврда на неговата способност да создава и управува со огромни мрежи на дата-центри. „Додека ‘Опен еј-ај’ продолжува да ги поместува границите на можностите, врвната инфраструктура на АВС ќе послужи како основа за нивните ВИ-амбиции“, изјави извршниот директор на компанијата Мет Гармен.

Акциите на „Амазон“ пораснаа за 4,5 отсто, достигнувајќи 255,29 долари на отворањето на берзата во Њујорк во понеделникот. „Енвидија“ се зголеми за 3,3 отсто, на 209,20 долари.

„Амазон“ е најголемиот светски продавач на изнајмена компјутерска моќ. Но до понеделникот, АВС беше исклучок – гледаше како речиси сите други големи компании за облачно компјутерство во САД им се приклучуваат на редиците на оние што градат или реконструираат дата-центри за поддршка на „Опен еј-ај“.

Планови на „Опен еј-ај“ за вложувања во ВИ вредни билион долари

Создавачот на ЧетГПТ неодамна соопшти дека се обврзал да инвестира 1,4 билион долари во чипови и дата-центри за напојување на вештачката интелигенција.

Bloomberg

„Мајкрософт“ (Microsoft Corp.), најголемиот инвеститор во „Опен еј-ај“ и претходно нејзин единствен снабдувач со облачни услуги – неодамна објави дека компанијата се обврзала да потроши околу 250 милијарди долари на нејзината облачна единица „Азур“ (Azure).

„Оракл“ (Oracle Corp.) потпиша договор вреден 300 милијарди долари за обезбедување дата-центри за „Опен еј-ај“, а претходно годинава компанијата откри дека платформата „Гугл клауд“ (Google Cloud Platform) на „Алфабет“ (Alphabet Inc.) е меѓу оние што го напојуваат ЧетГПТ.

Стартапот има и договор вреден 22,4 милијарди долари со „Корвив“ (CoreWeave Inc.), еден од водечките членови на новата генерација таканаречени неооблаци, кои им ги нудат своите услуги на развивачите на ВИ.

„Додавањето на АВС како клучен снабдувач со облачни услуги може да го намали притисокот врз ‘Опен еј-ај’, особено додека компанијата продолжува да склучува сè повеќе договори со неооблаци како ‘Корвив’, кои работат на многу помал обем од АВС“, напишаа минатата недела аналитичарите на „Блумберг интелиџенс“ (Bloomberg Intelligence) Анураг Рана и Ендрју Жерар, со што предвидоа ваков договор.

Тие додадоа дека АВС би можел да ѝ помогне на „Опен еј-ај“ и во меѓународната експанзија, со оглед на неговата глобална мрежа на дата-центри.

Според договорот објавен во понеделникот, „Опен еј-ај“ веднаш ќе започне да ја користи компјутерската моќ на АВС, при што целокупниот предвиден капацитет ќе биде обезбеден до крајот на 2026 година, со можност за проширување на соработката во следните години.

„Амазон“ ќе распореди стотици илјади чипови, вклучувајќи ги ВИ-акцелераторите GB200 и GB300 на „Енвидија“, во кластери дизајнирани да му помагаат на ЧетГПТ при генерирање одговори на кориснички прашања или при обучување на модели од следната генерација.

„Зголемувањето на капацитетите на граничната ВИ бара огромна и сигурна компјутерска моќ“, изјави извршниот директор на „Опен еј-ај“, Сем Алтман. „Нашето партнерство со АВС го зајакнува широкиот компјутерски екосистем што ќе ја напојува новата ера и ќе донесе напредна ВИ-технологија до секого.“

„Амазон“ е, исто така, меѓу најголемите поддржувачи на „Антропик“ (Anthropic PBC) – развивач на вештачка интелигенција основан од поранешни членови на „Опен еј-ај“. Компанијата од Сиетл минатата недела објави дека комплексот на дата-центри изграден за стартапот, кој користи стотици илјади од сопствените ВИ-чипови, Треиниум 2 на АВС, е целосно функционален.

Минатиот месец „Гугл“ соопшти дека ќе обезбеди до еден милион специјализирани ВИ-чипови за „Антропик“, во зделка вредна десетици милијарди долари.