Берзански преглед: „Редит“ изненади, „Мета“ се урна, Кина со нова ѕвезда

Минатата недела ја обележа средбата меѓу претседателот на САД Доналд Трамп и кинескиот претседател Шји Џјинпинг, како и објавувањето на финансиските резултати на повеќето компании од групата Величествените 7. Само во петокот имавме можност да видиме значителни скокови на акциите, но на неделно ниво се забележаа и загуби — се издвојува една компанија од седуката, чии акции се намалија за повеќе од една десетина.

Најпрво, индексите. Најпрепознатливите американски индекси – S&P 500, технолошкиот Nasdaq 100 и индустрискиот Dow Jones – забележаа раст и во петокот и на неделно ниво. Во двата случаи победник е Nasdaq, кој во петок порасна за 0,48 отсто, а на неделно ниво за речиси два проценти.

Кај конкретните акции најпрво ги издвојуваме Величествените 7 – поголемиот дел од нив минатата недела објавија деловни резултати. Во петок, повеќето акции се намалија, додека акцијата на „Амазаон“, по објавата на финансиските податоци, скокна за 9,58 отсто (комапнијата неодамна најави масовни отпуштања). Единствено уште акцијата на „Тесла“ се зголеми, и тоа за 3,74 отсто.

Најголем пад во петок забележа „Мета“ – речиси три проценти – и беше најслаба по принос меѓу седумте компании и на неделно ниво, со пад од над 12 отсто (многумина се прашуваат дали инвестициите во вештачка интелигенција ѝ се исплатуваат на компанијата и дали воопшто ќе се исплатат).

Од друга страна, три акции од групата на Величествените 7 забележаа неделен раст од над осум проценти – тоа се „Aлфабет“ (под кој спаѓа „Гугл“), „Амазаон“ и „Енвидија“. „Тесла“ забележа раст од солидни пет проценти.

Што се случува со „Нетфликс“ и „Редит“

Да споменеме уште две акции. Да започнеме со „Редит“, компанија која обезбедува платформа за форумски дискусии. Акцијата во петокот се зголеми за 7,47 отсто, но сепак на неделно ниво забележа загуба од −2,45 отсто.

Петочниот скок може да се објасни со најавата од четвртокот дека приходите во четвртиот квартал ќе ги надминат очекувањата на аналитичарите. Според „Блумберг“, „Редит“ се стреми да ја диверзифицира рекламната активност и корисничката база, додека истовремено ја искористува сè поголемата количина на кориснички објави, кои претставуваат вреден извор за компании што работат со вештачка интелигенција.

„Редит“ веќе има договори за лиценцирање на податоци со „Опен-еј-ај“ и „Гугл“, вредни стотици милиони долари.

Втората акција е „Нетфликс“. По изразениот пад во последната недела, кој го избриша растот од крајот на април, акцијата во петокот се зголеми за 2,74 отсто. Ја истакнуваме бидејќи компанијата најави поделба на акцијата на десет делови (моментално вреди над 1.100 долари), што треба да се случи во средината на ноември.

Минатиот петок, финансиската куќа „Ерсте груп“ ја промени препораката за акцијата од „купи“ во „задржи“. Според прогнозите на аналитичарите на Блумберг терминалот, над 70 отсто од нив препорачуваат купување на акцијата, над 26 отсто велат да се задржи, додека околу 3 отсто препорачуваат продажба. Целната цена за наредните 12 месеци, според консензусот на аналитичарите, е поставена за една петина повисоко од сегашната вредност.

Купување на акцијата на „Редит“ го препорачуваат 61 отсто од аналитичарите, 32 отсто велат да се задржи, а останатите се за продажба. Аналитичарите проценуваат дека потенцијалот на акцијата во наредните 12 месеци е +17,6 отсто.

Негативни кинески индекси

Се преместуваме кон Азија – што се случуваше по средбата Трамп–Шји? Кинеските индекси Hang Seng и CSI 300 завршија со негативен предзнак и на дневно ниво (петок: −1,43 отсто и −1,47 отсто) и на неделно ниво (−0,24 отсто и −0,43 отсто).

Многу подобро беше во Јапонија, според индексот Nikkei. Само во петокот вредноста се зголеми за 2,12 отсто, а на неделно ниво за дури 6,31 отсто. Да потсетиме, американскиот претседател Доналд Трамп оваа недела се сретна во јапонската престолнина Токио со првата премиерка на Јапонија, Санае Такаичи. Премиерката најави „златна ера“ на односите меѓу САД и Јапонија.

Меѓу азиските акции ја издвојуваме кинеската компанија „Виктори џајант технолоџи“. Акцијата на производителот на печатени кола (PCB) во петокот навистина се намали за повеќе од една десетина, но од почетокот на годината се зголеми за над 600 проценти. На нив се потпира и највредната компанија „Енвидија.

Индексот EuroStoxx 50, кој го следи движењето на водечките блу-чип компании од еврозоната, заврши пониско и на дневно ниво (−0,65 отсто) и на неделно ниво (−0,22 отсто).

Иста судбина го зафати и германскиот индекс DAX и францускиот CAC 40, додека британскиот FTSE 100 во петокот забележа пад од −0,44 отсто, но на неделно ниво заврши со раст од 0,74 отсто.

Злато, сребро и нафта

Највредната благородна метална суровина – златото – неделата ја заврши со вредност од 4.003 долари за унца, што претставува пад и на дневно и на неделно ниво. По значителниот пад, се поставува прашањето дали сега е вистинскиот момент за купување злато.

Приказната за среброто е малку поинаква: додека во петокот се намали за 0,49 отсто, на неделно ниво забележа раст од 0,12 остто.

Нафтата брент во петокот бележи мало зголемување на цената од 0,11 отсто, додека на неделно ниво се намали за −1,32 отсто.

Завршуваме со криптовалутите – податоците беа собрани во недела наутро, па се можни отстапувања. Најголемата меѓу нив, биткоин, имаше вредност од речиси 111.000 долари, што претставува пад од 1,79 отсто во последната недела, и 6,62 отсто во последниот месец.
Етер се движеше непосредно под 3.900 долари, што значи неделен пад од 2,14 отсто, а месечен пад од над 10 отсто. Според податоците од „Коин маркет кап“, доминацијата на биткоинот на пазарот на криптовалути повторно се засилува.