Продолжува падот на златото бидејќи трговскиот напредок ја еродира побарувачката за засолништа

Златото падна за повеќе од два отсто на берзата во Лондон, продолжувајќи го стрмниот пад што од вчера е карактеристика за пазарите на скапоцени метали, а како последица на тоа што напредокот во трговските разговори меѓу САД и Кина ја намали побарувачката за засолништа.

Златото денеска падна на околу 3.900 долари за унца, откако вчера неговата вредност се намали за 3,2 проценти, бидејќи преговарачите од Вашингтон и Пекинг изјавија дека постигнале договори за повеќе прашања, вклучувајќи ги и царините и контролата на извозот. Пад забележаа и среброто, платината и паладиумот.

Златото се повлече од рекордот над 4.380 долари за унца што го постигна минатиот понеделник во услови на брз раст. Сепак, сè уште е во пораст од речиси 50 проценти оваа година, главно поради купувањето од централните банки и трговијата со девалвација, во која инвеститорите ги избегнуваат државниот долг и валутите за да се заштитат од ненадејните буџетски дефицити, кои обезбедуваат поддршка и привлекуваат малопродажни инвеститори што се натрупаа во фондовите за тргување со злато на берза бидејќи цените годинава растат.

Bloomberg Mercury

 

ЕТФ-овите ги намалија своите резерви од слато за 448.706 унци поради вчерашниот пад на цените, кој инаку е најголем во последните шест месеци. Продажбата беше еквивалентна на 1,79 милијарда долари според вчерашната спот-цена.

„Во вакви услови тешко е да се одреди дното“, рече Крис Вестон, раководител за истражување во „Пеперстоун“ (Pepperstone Group Ltd.). „Засега има повеќе смисла да им се дозволи на другите да ја завршат тешката работа и тактички да купуваат акции по падот.“

Брзиот пораст на златото, како и неодамнешното повлекување, беше жешка тема на конференцијата за благородни метали на Лондонската асоцијација на пазарот на злато што се одржува во Кјото. Општото расположение беше оптимистичко, при што анкета на 106 учесници предвидуваше дека златото ќе се тргува по речиси 5.000 долари за унца за една година отсега.

Сепак, побарувачката од централните банки не е толку силна како што беше, а подлабока корекција би можела да биде добредојдена од професионалните трговци, смета Џон Рид, пазарен стратег во Светскиот совет за злато, кој вчера имаше свое излагање на настанот, кој е најголем годишен собир за индустријата.

Падот може да претставува можност централните банки да ги зголемат купувањата. Централната банка на Јужна Кореја, која последен пат купуваше златни прачки пред повеќе од една деценија, разгледува дополнителни купувања на среден и/или долг рок, според официјален претставник на собирот во Јапонија.

Пресвртот во трговската војна, односно намерата на САД за склучување договори со Кина, заедно со промената на замавот на цената на златото и евентуалното завршување на затворањето на американската влада, ќе ја намали вредноста на овој метал во наредните недели, изјавија вчера аналитичарите на „Ситигруп“ (Citigroup Inc.), вклучувајќи го и Макс Лејтон. Банката очекува златните прачки да паднат на 3.800 долари за унца во следните три месеци.

Спот-златото падна за два отсто, на 3.903,45 долари за унца, во рамките на утринското тргување во Лондон. Среброто падна за дури 2,8 проценти, откако вчера изгуби 3,7 отсто од вредноста, додека платината и паладиумот поевтинија за повеќе од три отсто. Индексот за вредноста на доларот на „Блумберг“ малку се промени.

Во САД се очекува креаторите на политиките на Федералните резерви (Фед) да ги намалат стапките за 25 базични поени на нивниот дводневен состанок, кој завршува утре. Пониските каматни стапки обично се во корист на златото, кое не исплаќа камата.

Пазарот исто така разгледува и листа од пет можни наследници на претседателот на Фед, Џером Пауел, кој треба да ја напушти својата функција следниот мај. Министерот за финансии Скот Бесент потврди дека групата се стеснила на два од сегашните членови на одборот на Фед, Кристофер Волер и Мишел Боуман, поранешниот гувернер на Фед, Кевин Ворш, директорот на Националниот економски совет на Белата куќа, Кевин Хасет, како и извршниот директор на „Блекрок“ (BlackRock Inc.), Рик Ридер.