По тешката 2025-та, европските производители на автомобили ја гледаат светлината во 2026-та

Европските производители на автомобили се приближуваат кон закрепнување следната година, по серијата предупредувања за добивка во 2025 година. Намалувањето на трошоците и плановите за преструктурирање ги поттикнаа аналитичарите да ги зголемат процените за заработка.

Според податоците на „Блумберг интелиџенс“ (Bloomberg Intelligence), индексот Stoxx Europe 600 Auto е на пат кон нагло зголемување на добивката по акција во 2026 и 2027 година.

„Оваа година најверојатно е ‘дното’ за заработката во секторот, а од 2026 година следува закрепнување“, вели стратегот Лорен Дуле, бидејќи новите субвенции за електрични возила, мерките за намалување на трошоците и стратешките промени ја подобруваат перспективата.

Европските производители на автомобили се подготвени за закрепнување по тешката 2025 година
Сегменти од индексот Stoxx Europe 600 Consumer Discretionary

Bloomberg

Добивките на автомобилските компании беа погодени на повеќе фронтови во 2025 година, бидејќи се соочија и со внатрешни неуспеси и со надворешни предизвици – од американските царини и ослабената побарувачка во Кина до агресивната конкуренција од кинеските производители и забавувањето на пазарот на електрични возила.

Производителот на луксузни автомобили „Порше“ (Porsche AG) годинава четири пати ги намали своите прогнози, откако реши да ги ограничи амбициите за електрични возила. Сопственикот на „Џип“ (Jeep), „Стелантис“ (Stellantis NV), запиша еднократни трошоци вредни милијарди долари поради приспособување на понудата и пренасочување на производството во САД, додека „Рено“ (Renault SA) пријави загуба од 9,5 милијарди евра (10,9 милијарди долари) поради сметководствена промена во учеството во „Нисан мотор“ (Nissan Motor Co.).

Понова пречка претставува и недостигот од клучни компоненти од производителот на чипови „Нексперија“ (Nexperia BV), заглавен во политички спор меѓу Холандија и Кина. Минатата недела „Фолксваген“ (Volkswagen AG) предупреди дека исполнувањето на финансиските цели зависи од континуираната испорака на полупроводници, додавајќи дека има доволно чипови за да ги одржи германските фабрики во работа само една недела.

„Вкупното производство на автомобили може да се движи само со брзината на најбавните компоненти“, изјави аналитичарот на „Ситигруп“ (Citigroup), Рос Макдоналд. Тој додаде дека проблемот со „Нексперија“ би можел дополнително да ја наруши автомобилската продукција во четвртиот квартал.

Овие предизвици го задржаа секторот под нивото на поширокиот европски индекс.

Европските производители на автомобили заостануваат зад поширокиот индекс

Bloomberg

Предизвиците и понатаму остануваат присутни во секторот, со знаци на продолжена слабост на клучните пазари во САД и Кина, а основните показатели сè уште се „кревки“, оценува Дуле. 

Сепак, трендот може да се промени, бидејќи автомобилските компании очекуваат 3 милијарди евра нови субвенции за електрични возила во Германија до 2029 година, додека мерките за намалување на трошоците и преструктурирањето на моделските линии треба да почнат да носат резултати во 2026 година.

„Порше“, која се соочува со ослабена побарувачка во Кина, тесни грла во синџирот на снабдување и намален интерес за електрични возила, во најновите резултати сигнализираше дека најтешкиот период можеби е зад неа, со цел повторно да го зацврсти својот луксузен имиџ.

„Иако на ‘Порше’ ѝ требаше долго време да се справи со падот на продажбите во Кина и со стратешкото приспособување кај електричните возила, веруваме дека најголем дел од тоа веќе е завршен“, изјави аналитичарот на „Ситигруп“ (Citigroup) Харалд Хендриксе, кој очекува значително подобрување на добивката во 2026 година.

Матичната компанија „Фолксваген“, која запиша загуба од 2,7 милијарди евра поврзана со стратешката промена на „Порше“, пријави солиден паричен тек и маржи за третиот квартал, зголемувајќи ја довербата на инвеститорите во можноста за закрепнување. Компанијата оваа недела соопшти дека ублажувањето на трговските тензии меѓу САД и Кина е „позитивен сигнал“ за потенцијалното продолжување на испораките на чипови од „Нексперија“ (Nexperia).

„Овие резултати, и покрај одредените нијанси, претставуваат убедлив доказ за основната сила на бизнисот“, изјави аналитичарот на „Дојче банк“ (Deutsche Bank) Тим Рокоса, додавајќи дека новите модели и заштедите ќе ја поддржат оваа „крајно потребна“ ликвидност.

„Мерцедес“ (Mercedes-Benz Group AG) ја задржа својата прогноза и објави програма за откуп на акции од 2 милијарди евра, насочена кон намалување на трошоците за одржување на профитабилноста, додека продажбите на „Стелантис“ покажуваат знаци на подобрување во Северна Америка, каде што компанијата се фокусира на производство на теренски возила за својот главен пазар во САД.

Оптимизмот дополнително го поттикна растот на продажбата на автомобили во Европа, која во септември порасна трет месец по ред. Во комбинација со намалувањето на загриженоста околу царините и ефектите од реструктурирањето што почнуваат да се одразуваат на добивките, изгледите за 2026 година се охрабрувачки.