Штрајкови во девет фабрики на „Фолксваген“, се грчиме и ние

Работниците во девет фабрики за автомобили и компоненти на „Фолксваген“ (Volkswagen) низ Германија ќе штрајкуваат неколку часа денеска, соопшти синдикатот „ИГ метал“ (IG Metal), со што производствените ленти ќе бидат запрени поради судирот на работниците и раководството околу иднината на производството на концернот во матичната земја.

Се очекува илјадници луѓе да се соберат во седиштето на производителот на автомобили во Волфсбург. Демонстрации се очекуваат и во фабриката во Хановер, која вработува околу 14.000 луѓе, како и во други фабрики за компоненти и автомобили, вклучувајќи ги Емден, Салцгитер и Брунсвик.

Штрајковите, кои би можеле да прераснат во 24-часовни или неограничени штрајкови доколку не се постигне договор во следната рунда преговори за платите, ќе го нарушат производството на „Фолксваген“ во време кога компанијата веќе се соочува со опаѓање на испораките и со намален профит.

Портпаролот на компанијата во неделата рече дека производителот на автомобили го почитува правото на работниците на штрајк и дека презел чекори за да обезбеди основно ниво на снабдување за клиентите, како и да го минимизира влијанието на штрајкот.

Синдикатот минатата недела предложи мерки за кои рече дека ќе заштедат 1,5 милијарда евра , вклучувајќи и откажување од бонусите за 2025 и 2026 година, кои најголемиот европски производител на автомобили ги отфрли.

„Фолксваген“ побара намалување на платите за 10 отсто, тврдејќи дека треба да ги намали трошоците и да го зголеми профитот за да го заштити пазарниот удел.

Компанијата исто така се заканува дека ќе затвора фабрики во Германија, што е првпат во нејзината 87-годишна историја.

Договорот да не се организираат штрајкови истече во саботата, овозможувајќи им на работниците да штрајкуваат од неделата низ германските фабрики на „Фолксваген“.

Синдикатот ги повика вработените во погоните сместени под подружницата „Фолксваген Саксен ГмбХ“ (Volkswagen Sachsen GmbH), во кои спаѓа и фабриката само за електрични возила во Цвикау, да штрајкуваат во понеделник и во вторник.

Преговорите ќе продолжат на 9 декември за нов работен договор, при што синдикатите ветија дека ќе се спротивстават на какви било предлози што не обезбедуваат долгорочен план за секоја фабрика на Фолксваген.

Проблемите во најголемиот производител на автомобили во светот неминовно се пренесуваат на сите сегменти што се поврзани со неговата дејност, па така, и фабриките во Македонија што работат за потребите на „Фолксваген“ веќе се соочуваат со намалени нарачки.

Како што пишуваше „Блумберг Адрија“, кај некои фабрики во земјава падот на нарачките е и 30 проценти.

„Бидејќи ефектот на тоа што се случува во Европа доаѓа со мало задоцнување во локалните доставувачи на големите автомобилски производители, она што го кажав пред месец и половина, за жал почна да се остварува и ние сме веќе соочени со намалени нарачки“, рече Огнен Цубалевски, кој ја предводи фабриката на „ОДВ електрик“ (ODW Elektrik), германскиот производител на кабли и други компоненти, во земјава.

Тој вели дека како јавност треба да сме загрижени поради овие трендови, затоа што секторот на доставувачи на автомобилската индустрија во Македонија вработува над 30.000 луѓе и во најголем дел работи за потребите на големите европски брендови, претежно германските.

„Ние како компанија сме целосно зависни од нашите клиенти. Немаме производство за генералниот пазар, туку работиме по конкретни нарачки, за точни компоненти, и секој пад на продажбата и профитабилноста кај нашите купувачи се пренесува во целост и кај нас. Во иста ваква ситуација се и другите странски инвестиции од автомобилскиот сектор во Македонија“, објаснува нашиот соговорник.

„Фолксваген“ не е сам во барањето да се крати. „Форд“ деновиве објави планови за елиминирање на уште 4.000 позиции во Европа - околу 14 отсто од својата работна сила на континентот - поради слабата побарувачка за електрични возила. Повеќето од кратењата ќе ја погодат германската присутност на производителот, во уште еден удар за индустриското производство во најголемата економија во Европа. Продажбата на автомобили во регионот стагнираше во октомври, со падови во Франција, Италија и во Велика Британија, кои во голема мера го поништија подобрувањето во Германија.