Проблемите со возилата ја уништија маржата на БМВ

Главното мерило за профитабилност на БМВ (BMW AG) во третиот квартал падна на најниско ниво во последниве над четири години бидејќи скапото повлекување и слабата побарувачка во Кина влијаеја на заработката.

Маржата на компанијата за производство на автомобили пред камати и даноци падна на 2,3 проценти, што е далеку под целта за 2024 година од најмалку шест отсто и е најниска од вториот квартал на 2020 година, кога пандемијата на коронавирусот буквално ја уништи трговијата.

БМВ во септември ја повлече својата прогноза за годинава, откако неисправниот систем за сопирање, испорачан од „Континентал“ (Continental AG), го принуди да повлече дури 1,5 милион возила. Компанијата издвои средства од речиси една милијарда евра (1,1 милијарда долари) за да ги поправи дефектите и мораше привремено да ги запре испораките на стотици илјади возила со повисоки цени.

Bloomberg Mercury

Проблемите дополнително го влошија и онака тешкото време бидејќи слабата побарувачка во Кина и во Европа ја погоди продажбата и дополнително ги намали маржите.

Во Кина, најголемиот пазар на БМВ, продажбата падна за 30 проценти во периодот јули-септември бидејќи потрошувачите ги намалија трошењата на луксуз, а локалните производители на автомобили понудија поевтини алтернативи. БМВ и „Мерцедес“ (Mercedes-Benz Group AG) заостанаа зад БЈД (BYD Co.), компанија што на пазарот понуди низа целосно електрични и хибридни возила.

Продажбата на БМВ во третиот квартал се намали во секој регион, иако имаше одреден успех со електричните возила. Испораките на автомобилите на БМВ што работат на батерии, како што се седанот „ај 4“ (i4) и спортското теренско возило „ај икс 1“ (iX1), во однос на претходната година се зголемија за 10 проценти. Во „Мерцедес“  испораките на големо на патнички електрични возила паднаа за 31 отсто во посочениот период.

Нето-добивката на БМВ падна за 36 проценти во однос на минатата година, на 6,1 милијарди евра.

Компанијата очекува значително намалување на заработката на групацијата пред оданочување и малку пониски испораки на возила отколку во претходната година, со маржа во производството на автомобили меѓу шест и седум отсто.