Производителите на возила заглавени во проблеми - пад на продажбата во Европа

Продажбата на автомобили во Европа падна во септември, што претставува прв последователен месечен пад во повеќе од две години, бидејќи економијата во регионот продолжи да стагнира, а потрошувачите ги намалија трошоците.

Регистрациите на нови автомобили опаднаа за 4,2 отсто во споредба со пред една година, на 1,12 милион возила, објави утрово Европската асоцијација на производители на автомобили. Добивките од продажбата на електрични возила (ЕВ) не беа доволни за да се компензира падот кај моделите со мотори со согорување.

Европските производители на автомобили се мачат да ја подобрат продажбата на својот домашен пазар поради долготрајниот пад и повисоките каматни стапки, кои ја намалуваат потрошувачката. „Стелантис“ (Stellantis NV), сопственик на брендови што ги вклучуваат и „Фиат“ (Fiat) и „Пежо“ (Peugeot), забележа еден од најголемите падови, со намалување на бројот на регистрациите во регионот за дури 26 проценти.

Процентуална разлика на вкупен број на регистрации на нови возила на годишно ниво Bloomberg Mercury

Од една страна продажбата благо порасна во Обединетото Кралство и Шпанија, а од друга падна во Германија, Франција и Италија, намалувајќи ги вкупните испораки низ целиот регион.

Продажбата на ЕВ отскокна во септември, што е добар знак за индустријата, која забележа пад на побарувачката за целосно електрични автомобили откако владите минатата година ги повлекоа субвенциите. Испораките на ЕВ се зголемија за 24 отсто во Обединетото Кралство, каде што производителите на автомобили имаат големи попусти за да се усогласат со владиниот план за продажба на возила со нула емисии. Во Германија, каде што владата разговара за потенцијалот на нова поддршка, продажбата на ЕВ се зголеми за 8,7 проценти.

Bloomberg Mercury

Од почетокот на годината до денес продажбата на електрични возила во регионот сè уште е во негатива и споредено со истиот период лани е помала за 2,6 отсто. Изгледите се комплицирани поради планираните царини за електричните возила од кинеско производство во висина од дури 45 проценти, кои треба да стапат во сила во наредните недели. ЕУ и Кина ветија дека ќе работат на алтернативен договор со кој ќе се избегне потребата од наметнување дополнителни давачки, а германскиот канцелар Олаф Шолц вчера го повтори својот став против царините.

Број на регистрации на нови возила во септември според производители и споредено на годишно ниво Bloomberg Mercury

Со оглед на тоа што потрошувачите се воздржуваат од купување поради високите трошоци за поседување возило на електричен погон, најголемите европски производители на автомобили сега се обидуваат да ја оживеат продажбата со модели со пониска цена. „Рено“ (Renault) минатата недела го претстави својот нов модел „Р5“ (R5) од 25.000 евра, додека „Стелантис“ во средината на септември започна со испорака на својот градски автомобил „ситроен е Ц3“ (Citroën ë-C3) од 23.300 евра.

Најголемиот производител на автомобили во регионот, „Фолксваген“ (Volkswagen AG), се соочува со затворање фабрики без преседан во Германија поради падот на побарувачката. Неговиот бренд на спортски автомобили „Порше“ (Porsche AG) и ривалот „Мерцедес“ (Mercedes-Benz Group AG) ги приспособија своите амбиции во однос на електричните возила на пониско ниво од очекуваното за овие модели.

Падот на продажбата на електрични возила низ Европа го зголемува ризикот производителите како „Фолксваген“, „Стелантис“ и „Рено“ да платат казни од дури 15 милијарди евра доколку не ги исполнат построгите европски правила за емисиите на гасови од возните паркови.