Пад на цените на половните возила во Германија, Македонија на пат на рекорден увоз

Просечната цена на употребуваните автомобили во Германија во септември годинава падна за околу 300 евра, на 26.487 евра, достигнувајќи го најниското ниво од јануари 2022 година, кога просечната цена беше 26.252 евра, покажуваат податоците на германскиот пребарувач „Аутоскаут24“ (AutoScout24). Во изминатава година просечната цена на употребуваните автомобили на германскиот пазар е намалена повеќе од пет проценти или за 1.397 евра. Од врвот во март 2023 година, кога цените на половните автомобили беа највисоки, цените се намалени за повеќе од девет проценти. Сепак, треба да се нагласи дека цените се многу повисоки отколку што беа пред пандемијата. Во споредба со јануари 2020 година, тие во моментов сѐ уште се повисоки за 27 проценти.

Цените вообичаено паѓаат за време на летните месеци

Според Стефан Шнек, шеф на продажба во „Аутоскаут24“, поради слабата побарувачка, во текот на летните месеци дилерите ги намалуваат цените на своите возила.

„Во септември сезонската зголемена побарувачка одговара на намалената понуда со малку пониски цени“, вели Шнек.

Движењето на цените на половните автомобили се следи и според погонот: бензински, дизел, хибридни, електрични, метан и течен нафтен гас. Во споредба со минатата година, најмногу поевтиниле употребуваните автомобили со погон на метан, чија просечна цена се намалила од 15.443 на 12.157 евра или за 21,2 проценти. Втори на листата се електричните автомобили, кои поевтиниле во просек за 10,8 проценти или за 3.636 евра. Просечната цена на електричните автомобили во септември била 29.939 евра. По нив следуваат автомобилите со дизел-мотори, кои поевтиниле за 2.241 евро или 7,6 проценти на годишно ниво односно во септември имаа просечна цена од 27.113 евра.

Половните автомобили на бензин се поевтини за 4,8 проценти на годишно ниво (1.251 евро) односно просечната цена во септември падна на 24.575 евра. Просечните цени на половните автомобили со хибриден погон и на течен нафтен гас се најстабилни. 

Над 3.000 половни возила месечно се увезуваат во Македонија

Познато е дека Германија е еден од главните пазари од кои се увезуваат употребувани автомобили во Македонија и ваквите трендови очигледно влијаат врз зголемена побарувачка и во нашата земја, за што најдобар показател се податоците на Царинската управа. Имено, од јануари до септември годинава во Македонија биле увезени вкупно 29.768 половни патнички автомобили или, во просек, над 3.000 половни автомобили месечно.

Доколку увозот продолжи со исто темпо и во последните три месеци од годинава, Македонија е на добар пат да оствари рекорден увоз на употребувани автомобили во 2024 година. Инаку, статистиката открива дека во Македонија континуирано се увезуваат повеќе употребувани отколку нови автомобили, што резултира со зголемување на возниот парк во земјава, и тоа од 121,1 патнички автомобил на илјада жители во 2007 година на 302,8 автомобили на илјада жители во минатата година.  

Македонците претпочитаат стари дизелаши

Во нашата земја нема статистички податоци за просечната цена на половните автомобили, но доволно е да се излезе на улица и да се увиди дека возниот парк во земјава е постар отколку германскиот, што е сосема логично ако се земе предвид разликата во животниот стандард меѓу двете земји. Според официјалните статистички податоци, од вкупниот број регистрирани возила во Македонија доминираат оние што се произведени пред 2008 година.

Кога станува збор за изборот на автомобили според горивото, статистиката покажува дека во Македонија најмногу се возат автомобили со погон на дизел. Имено, според податоците на Државниот завод за статистика, од вкупно 483.477 патнички автомобили евидентирани на крајот на 2022 година, дури 280.737 биле на нафтен погон.

 

Како се вижат цените на половните автомобили во Македонија?

Во Македонија има голема понуда на употребувани автомобили за сите вкусови и за сечиј џеб. Имено, на специјализираните веб-страници за продажба може да се најдат половни автомобили од сите класи и различни погони, а цените главно зависат од годината на производство, кубикажата, изминатите километри. Така за 2.300 евра може да се купи „мерцедес а 170 ЦДИ“ со дизел мотор произведен во 2002 година со изминати 198.000 километри. За „рено меган 1.9 ДЦИ“ со дизел мотор произведен во 2008 година и со изминати 177.000 километри треба да се одвојат 5.300 евра, а „фолксваген голф 1.6 ТДИ“ од 2013 година со изминати 205.000 километри чини 10.800 евра.

Оние кои сакаат автомобили од повисоките класи и од поново производство треба да одвојат 20.700 евра за „фолксваген пасат 1.6 ТДИ“ од 2020 година со изминати 157.000 евра. „Шкода кодиак 2.0 ТДИ“ од 2019 година со изминати 160.000 километри чини 27.600 евра, а „БМВ 3 Г20 хибрид аутоматик“ од 2020 година и изминати 115.000 километри се продава по цена од 31.400 евра.          

Потребна е внимателност при изборот на возило

Купувањето половно возило носи одредени ризици. На пазарот има многу автомобили со штелувани километри и скриени дефекти, предупредуваат од Авто-мото сојузот на Словенија (АМЗС). Многу е тешко тие да се забележат со површно гледање на автомобилот.

„Автомобил што изгледа многу убаво и добро одржуван може да има и повеќе од 300.000 километри или многу повеќе од прикажаната состојба. Со менување на воланот, рачката на менувачот, педалите и козметичките поправки, вистинската состојба на автомобилот може многу добро да се прикрие“, предупредуваат од АМЗС.

На дигиталните табли, кои стануваат доминантни во ерата на дигитализација и електрификација, лажното внесување километри е брзо, едноставно и евтино, пишува Петер Кавчич, уредник на порталот на АМЗС - „Добер авто“ (DoberAvto.si). Тој советува купувачите темелно да ја проучат историјата на користениот автомобил што сакаат да го купат. Тоа можат да го направат со помош на сервисната книшка, во која може да се провери кога и на колку километри автомобилот бил сервисиран.

Со помош на Урош Божин