Бројот на автомобили во Македонија надмина 615.000, доминираат „полнолетни“ дизелаши

Бројот на регистрирани патнички автомобили на крајот на минатата година изнесувал 615.382, што е за околу 35.000 автомобили повеќе отколку во 2024 година и двојно повеќе во однос на 2012 година, кога на македонските патишта имало нешто повеќе од 301.000 патнички автомобили, покажуваат податоците на Државниот завод за статистика.

Карактеристично за македонскиот возен парк во изминативе години е тоа што како што расте бројот на автомобили така расте и нивната просечна старост. Имено, во 2010 година просечната старост на патничките автомобили во земјава била 16,3 години, а лани таа изнесувала 19,3 години.

Македонија на пат да стане земја на олдтајмери

Всушност, статистичките податоци откриваат дека од вкупниот број регистрирани патнички автомобили во Македонија, лани дури 485.787 биле произведени до 2011 година.  

  

 

Ако се земе предвид дека според официјалните дефиниции за олдтајмер се смета возило што е постаро од 30 години, не е тешко да се заклучи дека голем дел автомобили во македонскиот возен парк се на пат да станат олдтајмери.    

Во Македонија речиси секоја години увозот на употребувани автомобили неколкукратно го надминува увозот на нови автомобили. Во текот на 2025 година во земјава биле увезени вкупно 60.459 патнички автомобили, од кои 46.805 биле употребувани автомобили, а 13.654 биле нови автомобили. Податоците на Царинската управа покажуваат дека бројот на увезени употребувани автомобили лани бил најголем во изминативе пет години.

Мал пробив на хибридните и електричните автомобили

Кога станува збор за видот на горивото, во земјава доминираат автомобилите со погон на дизел (нафта) и на бензин, а ама и значителен број автомобили со комбиниран погон на бензин и гас.

На македонските патишта лани имало нешто повеќе од две илјади електрични автомобили, а бројот на автомобилите со хибриден погон изнесувал 7.393, што е занемарлив дел во вкупниот возен парк.  

Купувањето половен автомобил носи ризици    

„Блумберг Адрија“ веќе пишуваше дека купувањето половно возило носи одредени ризици. На пазарот има многу автомобили со штелувани километри и скриени дефекти, предупредија од Авто-мото сојузот на Словенија (АМЗС). Многу е тешко тие да се забележат со површно гледање на автомобилот.

„Автомобил што изгледа многу убаво и добро одржувано може да има и повеќе од 300.000 километри или многу повеќе од прикажаната состојба. Со менување на воланот, рачката на менувачот, педалите и козметичките поправки, вистинската состојба на автомобилот може многу добро да се прикрие“, наведуваат од АМЗС.

 

На дигиталните табли, кои стануваат доминантни во ерата на дигитализација и електрификација, лажното внесување километри е брзо, едноставно и евтино. Затоа купувачите би требало темелно да ја проучат историјата на користениот автомобил што сакаат да го купат. Тоа можат да го направат со помош на сервисната книшка, во која може да се провери кога и на колку километри автомобилот бил сервисиран.

Освен сервисната книшка, за историјата на автомобилот може многу да помогне проверката на бројот на шасијата. Повеќе онлајн платформи за проверка на историјата на возилата располагаат со бази на податоци за стотици милиони возила и нудат можност да се провери дали е извршена манипулација со километражата, што незаконски ја зголемува цената на возилото. Потоа, дали возилото учествувало во сообраќајна несреќа односно дали било оштетено или, пак, дали е можеби украдено од некоја земја.