„Фолксваген“ повторно ја намали прогнозата за профитот поради слабата побарувачка за автомобили

„Фолксваген АГ“ ги намали своите прогнози по втор пат оваа година, предупредувајќи дека намалената побарувачка ќе ја намали профитабилноста на германскиот производител на автомобили, кој се соочува со синдикатите поради можните кратења на работни места и затворањето на фабриките. Производителот вчера соопшти дека сега очекува оперативна маржа од 5,6 проценти. Тоа е помалку од предвидувањата од дури седум проценти во јули, кога „Фолксваген“ првично ги намали своите очекувања, делумно поради очекуваните трошоци од затворањето на фабриката на „Ауди“ во Белгија. Нето готовинскиот тек во автомобилскиот оддел сега се очекува да биде помал од половина од нивото што го предвиде компанијата. 

Сите три големи германски производители на автомобили – „Фолксваген“, „Мерцедес-Бенц Груп АГ“ и „БМВ АГ“ предупредија за движењето на профитот во последните месеци. Секој од нив се бори со побавна продажба во Кина, каде што купувачите се воздржуваат поради продлабочувањето на кризата со недвижностите. Зголемената конкуренција кај електричните возила, исто така, предизвикува големи попусти и ги намалува маржите, а истовремено опаѓачката доверба на потрошувачите ја намалува побарувачката за автомобили со мотори со согорување.

Намалувањето на изгледите на „Фолксваген“ ги зголемува предизвиците за главниот извршен директор Оливер Блум, кој предупреди дека трошоците во Германија се превисоки бидејќи растот на електричните возила забавува и кинеските производители предводени од БЈД  навлегуваат во Европа.

Компанијата размислува за затворање на погони во Германија за прв пат во својата историја и ги укина повеќедецениските ветувања за безбедност на работните места додека се обидува да стане поконкурентна. Раководните лица посочија на вишокот капацитет на две фабрики за автомобили, што ги стави на патеката за долготраен конфликт со моќните работнички групи.

„Вестите му помагаат на ‚Фолксваген‘да го затвори вишокот капацитет во Германија“, рече аналитичарот на „Блумберг Интелиџенс“ (Bloomberg Intelligence), Џакомо Регелин. „Како и со ‚Мерцедес‘, очекуваме да следат дополнителни предупредувања за профитот“.

„Фолксваген“сега очекува нето готовинскиот тек во автомобилскиот оддел да достигне околу две милијарди евра (2,2 милијарди долари), што е намалување од 4,5 милијарди евра, делумно поради активностите поврзани со преземањата и аквизициите, вклучително и партнерството со „Ривиан“ (Rivian Automotive Inc.) за технологијата за електрични возила.

„Фолксваген“ соопшти дека неговиот истоимен бренд на патнички автомобили и единицата за комерцијални возила работат под очекувањата. Компанијата ги означи дополнителните ризици за својата групација за производство на автомобили во голем обем, која ги вклучува и „Шкода“ и „Сеат“, наведувајќи го „влошувањето на макроекономското опкружување“ како причина.

Глобалните испораки на компанијата ќе се намалат на околу девет милиони единици оваа година, од 9,24 милиони во 2023 година, објави вчера „Фолксваген“. Производителот на автомобили претходно предвиде зголемување од три проценти.