„Фолксваген“ влегува во нов квартал со пад на продажбата, Кина е кочницата

„Фолксваген“ (Volkswagen AG) предупреди дека неговата продажба оваа година повторно би можела да се намали, додека кризата на кинескиот пазар дополнително ги отежнува напорите на извршниот директор Оливер Блуме да спроведе темелна реорганизација на најголемиот европски производител на автомобили.

Германскиот производител сега очекува приходите годинава да му се намалат за дури три отсто, откако претходно прогнозираше дека тие ќе останат на исто ниво или ќе пораснат до три отсто. „Фолксваген“ се соочува со сериозни предизвици во Кина, каде што домашните производители ја презедоа водечката позиција на пазарот на електрични возила. Тие сега сè поагресивно се шират и на европскиот пазар, менувајќи го односот на силите во европската автомобилска индустрија.

Намалувањето на прогнозата покажува со колкави предизвици се соочува Блуме, кој се обидува да го направи „Фолксваген“ пофлексибилен и поефикасен по долгогодишното заостанување во развојот на софтвер, високите трошоци и падот на профитабилноста. Неговиот план за укинување до 100.000 работни места и затворање четири фабрики наиде на отпор од Надзорниот одбор на компанијата на почетокот на месецов.

Акциите на „Фолксваген“ во Франкфурт паднаа за дури 3,2 отсто, со што нивниот пад од почетокот на годината достигна 31 отсто.

Bloomberg

„Фолксваген“ очекува подобри деловни резултати во втората половина од годинава, при што Блуме ја истакна силната побарувачка за новите компактни електрични модели на компанијата. Како што наведе, за моделите од семејството ИД. Поло за само неколку недели биле примени 70.000 нарачки.

„Фолксваген“ и натаму очекува вкупниот годишен резултат да биде подобар отколку во 2025 година и останува на прогнозата дека оперативната маржа ќе изнесува од четири до 5,5 отсто.

Групацијата има фабрики што не се доволно искористени, заостанува зад конкуренцијата по трошоците за 30 отсто и мора да ги намали општите трошоци за најмалку 10 милијарди евра (11,4 милијарди долари), изјави во петокот финансискиот директор Арно Антлиц во интервју за Блумберг ТВ.

„Имаме одлични производи, но трошоците ни се превисоки“, рече тој.

Кинескиот пазар и натаму претставува најголем товар за работењето. Испораките на групацијата во Кина се намалија за дури 37 отсто во вториот квартал, откако домашните конкуренти, како „БЈД“ (BYD) и „Гили“ (Geely), дополнително ја зголемија својата предност во сегментот на електричните возила. Забавувањето на кинескиот сектор за недвижности негативно влијае врз куповната моќ и довербата на потрошувачите, што особено се одразува врз побарувачката за поскапи производи, како германските луксузни автомобили.

Кинеските производители на автомобили сега се шират и на домашниот пазар на „Фолксваген“, нудејќи подостапни електрични и хибридни модели. Тие не само што извезуваат автомобили во Европа, туку со нив доаѓа и силна конкуренција за европските производители, изјави Антлиц.

Тој притисок се чувствува низ целиот автомобилски сектор во Германија. „БМВ“ (BMW) минатиот месец ги намали прогнозите, наведувајќи ја слабата побарувачка во Кина и последиците од војната на Блискиот Исток. „Мерцедес-Бенц“ (Mercedes-Benz) и „Порше“ (Porsche) привлекуваат сè поголемо внимание бидејќи се потпираат на сè послабиот кинески пазар на луксузни и премиум автомобили.

„Фолксваген“ се обидува да ја обнови продажбата во Кина преку локални партнерства и побрз развој на нови модели. Групацијата соработува со „Експенг“ (Xpeng) на развој на нови електрични возила, додека „Ауди“ (Audi) се здружи со „САИК мотор“ (SAIC Motor) за да развие платформа за електрични возила наменета за кинескиот пазар.

Компанијата постигнала напредок во продуктивноста и очекува подобри резултати во втората половина од годинава благодарение на новите модели на „Ауди“ и ефектите од намалувањето на трошоците, изјави Антлиц.

Во подготовката на текстот учествуваше и Оливер Крук.