Македонски студенти создадоа иновативна платформа за автомобили

Марко Страхилов и Богдан Проданов, студенти на Факултетот за информатички технологии и компјутерско инженерство (ФИНКИ), создадоа иновативна peer-to-peer (P2P) платформа за споделување автомобили.

Startup Club Skopje

Jolzt e апликација што овозможува директна врска меѓу локалните сопственици на автомобили и потенцијалните корисници што бараат возило за изнајмување. Нејзините креатори велат дека е прва ваква не само во Македонија туку и на Балканот, a за „Блумберг Адрија“ раскажуваат како настанала.

„Идејата дојде од потребата за поефикасно користење и дигитализирање на изнајмувањето возила. Целта ни е да им овозможиме на рентакар-компаниите и на индивидуалните сопственици да ги изнајмуваат и да заработуваат од своите автомобили, а на корисниците да им го обезбедиме најдобриот автомобил за нивните потреби“, вели Проданов, UX/UI и графички дизајнер со тригодишно искуство во контент маркетинг и уредување видеосодржини.

Марко Страхилов и Богдан Проданов Startup Club Skopje

Апликацијата е достапна на Гугл плеј стор (Google Play Store) и на Епл стор (Apple App Store) и е едноставна за користење. Наменета е за патници, туристи или кој било што има потреба од возило. Корисниците имаат различни опции за краткорочно или долгорочно изнајмување, во зависност од нивните потреби. Во моментов за домаќините (сопствениците на возилата) апликацијата е достапна само во Скопје, но за оние што бараат да изнајмат автомобил, достапна е насекаде во светот. Планирано е проширување во други градови и прифаќање домаќини од нови локации на почетокот на следната година.

Startup Club Skopje

Страхилов, програмер со повеќегодишно искуство, нагласува дека особено внимание посветуваат на безбедноста за двете страни, соработувајќи со правни експерти и осигурителни компании за максимална сигурност и заштита.

„Нашата платформа нуди транспарентни цени и олеснет пристап до возила, правејќи го секојдневното патување убаво и едноставно“, вели тој.

Зборувајќи за првичните искуства, Проданов и Страхилов откриваат дека македонските граѓани навистина се заинтересирани да заработуваат од своите возила преку една ваква директна врска со потенцијалните корисници шо тие им ја овозможуваат преку нивниот стартап. Тие велат дека Македонците сакаат нови начини за дополнителна заработка, особено кога процесот е брз, едноставен и безбеден.

Startup Club Skopje

До првата и засега единствена инвестиција од 25.000 долари овие млади претприемачи стигнаа преку инкубаторската програма на „Стартап клуб Скопје“, македонски хаб за иновации и претприемаштво.

Емир Зеќовиќ Startup Club Skopje

Емир Зеќовиќ, маркетер со безмалку децениско искуство во SaaS индустријата, кој одлучи да вложи во компанијата и да се приклучи во тимот е убеден дека платформата има огромен потенцијал за успех. Првата цел им е да ја зголемат свесноста дека изнајмување и користење автомобили и други превозни средства може да се олесни и да се комплетира со само неколку клика. Фокусот во оваа фаза им е да остварат што е можно поголема комуникација со ренталните компании и со луѓето заинтересирани да заработат на нивната платформа преку изнајмување на своите возила. Иако се на почеток, веќе размислуваат за пробив на светскиот пазар.

„Нашата желба и визија се целосно дигитализирање на пазарот за изнајмување и користење возила каде што единствена обврска на оние што сакаат да ги изнајмуваат своите превозни средства или да користат нечии возила ќе им биде да се регистрираат на нашата платформа“, вели Зеќовиќ.