„Рено“ преку поскапите модели го одржува растот на приходите

Стратегијата на „Рено“ (Renault) за агресивно воведување на нови модели се исплатеше. Во третиот квартал од 2024 година, приходите од продажба на автомобили се зголемија за 1,8 отсто во споредба со третиот квартал во 2023 година (и 0,8 отсто во првите девет месеци кумулативно). Во генерално лоши пазарни услови на европскиот пазар на автомобили, генерално обележани со стагнација или опаѓање на приходите, „Рено“ му пркосеше на трендот во третиот квартал. „Рено“ ја задржува третата позиција меѓу производителите на автомобили во Европа, со пазарен удел од 9,8 отсто. Додуша, приходите претрпеа забележителен ефект од девалвацијата на аргентинскиот пезос, бразилскиот реал и турската лира (ефект од 289 милиони евра во апсолутна сума). При фиксни девизни курсеви, растот на приходите на групацијата „Рено“ би бил пет проценти.

Ако ги погледнеме продадените количини (на ниво на групацијата „Рено“), во третиот квартал од 2024 година тие се намалија за 5,6 отсто (и 0,4 отсто во првите девет месеци од 2024 година). Главните фактори го вклучуваат негативниот ефект од намалените регистрации на нови автомобили на клучните пазари во Франција и Германија, донекаде компензиран со растот во Бразил и намалениот залихи кај независните дилери (72 илјади единици во третиот квартал 2024 година). Сепак, „Рено“ го компензира помалиот обем на производство преку повисоки цени и нови, поскапи модели. Стабилната побарувачка за нови хибридни модели како што се „симбиоз“ (Symbioz) и „дастер“ (Duster) овозможи помалиот обем на продажба да не го повлече нивото на приход. „Рено“ е еден од ретките европски производители на автомобили кој не ги ревидирал своите очекувања надолу. „Рено“ ги задржа своите очекувања и цели на оперативна маржа од најмалку 7,5 проценти во 2024 година и слободен готовински тек од најмалку 2,5 милијарди евра.

Инвеститорите позитивно реагираа на проекциите и перформансите на „Рено“. Ако го споредиме „Рено“ со „Фолксваген“ и „Стелантис“, на берзата им оди многу подобро. „Фолксваген“ моментално „кубури“ со конфликтот на интереси на синдикатот, законодавниот дом и корпорацијата. „Стелантис“ бележи голем пад на испорачаните количини и неискористениот капацитет. „Фолксваген“ и „Стелантис“ги ревидираа очекувањата надолу и на тој начин беа казнети на берзата (меѓу другото). Ова е особено видливо кога се гледаат перформансите на акциите во изминатата година. Само „Рено“ бележи раст (од 35,3 проценти), додека „Фолксваген“ и „Стелантис“бележат солиден пад (9,3 и 28,9 проценти, соодветно).

Краткорочните очекувања за „Рено“ се формираат врз основа на стабилна книга на нарачки. Според „Рено“, книгата за нарачки е пополнета во следните два месеци, па во кварталот што следи останува само прашањето за извршување на нарачките. Долгорочните очекувања лежат во ветувањето за нови модели, вклучувајќи го и електричниот „Р5“, кој треба да предизвика носталгија кај потрошувачите за истоимениот модел популарен во 1980-тите и 1990-тите. За „Рено“ очекуваме растот на приходите да продолжи со едноцифрена стапка. Одредена доза на песимизам произлегува од фактот дека кинеските производители кои се конкурентни по цена може да го намалат пазарниот удел на „Рено“во Европа, како и прашањето за степенот на толеранција на потрошувачите за зголемување на цените и способноста на „Рено“ континуирано да пласира поскапи модели. Со стратегијата на повисоки цени и скапи модели „Рено“ сака да ги заштити нивоата на приходите и маржите.

Иако презентацијата за аналитичарите во третиот квартал не кажуваше премногу за задолженоста и ликвидноста, „Рено“ историски немаше проблеми со задолженоста и забележа ниски нивоа на задолженост (мерено преку нето долгот кон ЕБИТДА, кој на 31.12.2023 година укажа на нето готовинска позиција и изнесуваше негативни 0,44 пати). Според прогнозата на „Рено“во однос на слободниот готовински тек и оперативната маржа, може да се заклучи дека и ликвидносната позиција е солидна. Со оглед на амбициозниот план на „Рено“да го обнови своето портфолио на производи, и моќта и ликвидноста ќе бидат под лупа на инвеститорите и аналитичарите во следните квартали.

Во моментов нема коментари за веста. Биди прв да коментира...

Остави коментар