„Фолксваген“ е на чекор до договор со „ЏСВ“ за индискиот бизнис

„Фолксваген“ (Volkswagen AG) е во напредни преговори со групацијата „ЏСВ“ (JSW Group) за продажба на удел во својата индиска подружница, велат извори запознаени со разговорите, додека германскиот производител на автомобили бара партнер што ќе внесе свеж капитал и ќе помогне во зајакнувањето на неговото работење на третиот најголем автомобилски пазар во светот.

Двете страни работат на можен договор во наредните недели, според кој „ЏСВ“ ќе инвестира во приватната компанија „Шкода ауто Фолксваген Индија“ (Skoda Auto Volkswagen India Pvt.), велат изворите, кои побарале да останат анонимни бидејќи разговорите се доверливи. Конгломератот предводен од Саџан Џиндал сака да стекне мнозински удел во компанијата, додаваат тие.

Иако највисоките раководители на „Фолксваген“ и „ЏСВ“ неодамна одржале состаноци, повеќе клучни прашања сѐ уште не се решени, меѓу кои и проценката на вредноста на трансакцијата и висината на капиталот што ќе го вложат „ЏСВ“ и „Фолксваген“, велат изворите.

Доколку биде финализирана, трансакцијата ќе стави крај на повеќегодишната потрага на „Фолксваген“ по локален партнер во Индија. Германскиот производител и по повеќе од две децении присуство во земјата не успеа значително да го прошири своето работење. За конгломератот „ЏСВ“, кој работи во секторите од производство на челик до електрични возила, договорот би овозможил пристап до платформите за возила на „Фолксваген“ и би претставувал основа за понатамошна глобална соработка со еден од најпознатите европски производители на автомобили.

„Фолксваген“ постојано ги оценува новите деловни можности и различните деловни опции за спроведување на својата стратегија во Индија, изјави портпарол на компанијата во одговор испратен по електронска пошта. Индија е важен пазар за глобалните планови за раст на „Шкода ауто“, додаде портпаролот, одбивајќи да ги коментира разговорите со „ЏСВ“.

Портпарол на „ЏСВ груп“ не одговори на барањето за коментар испратено по електронска пошта.

Блумберг во ноември објави дека „Фолксваген“ ја намалил планираната инвестиција во нова платформа за електрични возила во Индија на околу 700 милиони долари, од првично планираната една милијарда долари.

Мал удел на пазарот

Групацијата „Фолксваген“, преку своите брендови „Шкода“, „Фолксваген“, „Ауди“, „Порше“, „Бентли“ и „Ламборгини“, има околу 2,5 отсто од индискиот пазар на патнички возила, што е под целта од пет отсто пазарен удел до крајот на деценијата, покажува извештај на локални медиуми објавен претходно годинава. Ваквиот скромен удел е забележан и покрај тоа што брендот „Шкода“ на индискиот пазар лансираше модели развиени специјално за таа земја, како компактниот теренец „Килак“ (Kylaq).

„ЏСВ“ и „Фолксваген“ ги почнале разговорите пред три години, а претходно тие биле насочени кон можноста „ЏСВ“ да ги користи производствените погони на „Фолксваген Индија“ во Пуна и Чатрапати Самбаџинагар, во индиската држава Махараштра. Сепак, најновите преговори меѓу двете компании сè уште треба да надминат неколку пречки и сè уште постои можност да пропаднат, велат изворите запознаени со разговорите.

Според истите извори, „Фолксваген“ станал поподготвен да се откаже од контролата врз својата индиска подружница додека се обидува да го подобри своето глобално работење. Иако индиската подружница забележала раст на добивката во финансиската година што заврши на 31 март, европската матична компанија станува сè повнимателна кога станува збор за понатамошно финансирање на бизнисот без локален партнер што би го поделил товарот.

Намалувањето на трошоците во Индија е дел од пошироките притисоци со кои се соочува „Фолксваген“ на глобално ниво, каде што групацијата настојува дополнително да ја засили веќе обемната програма за намалување на трошоците.

„ЏСВ“ има и заедничко вложување со кинеската „САИК мотор“ (SAIC Motor Corp.), која во Индија продава автомобили од брендот „МГ“ (MG), а планира и да воведе автомобили под брендот „ЏСВ“ на локалниот пазар. „Фолксваген“ претходно разговараше и за можно партнерство со „Махиндра енд Махиндра“ (Mahindra & Mahindra Ltd.), но локалните медиуми на почетокот од минатата година објавија дека разговорите пропаднале поради несогласувања околу трошоците за развој и корпоративната култура.

Германскиот производител на автомобили во повеќе наврати се обидуваше да изгради одржлив бизнис во Индија, но, како и другите европски производители, се соочува со тешкотии на пазарот чувствителен на цените, каде што доминираат домашните компании „Марути Сузуки Индија“ (Maruti Suzuki India Ltd.), „Хјундаи мотор Индија“ (Hyundai Motor India Ltd.), „Махиндра“ и „Тата моторс“ (Tata Motors Passenger Vehicles Ltd.) со своите подостапни модели.